Hulhliap Short Stay Centre hmasa ber zofel

Mizoram Sawrkar, Tlawmngai Pawl leh Kohhran tangkawp in Synod Revival Camping Center, Sihphir Neihbawi-a an buatsaih Hulhliap Short Stay Centre chu Inrinni khan a thawh khatna zawhfel a ni.

Ni 20 chhung awh Hulhliap Program-ah hian mumal taka ruihhlo avanga harsatna tawk te enkawl niin a buaipuitu Core Committee Chairman Malsawmzuala Ralte leh Secretary Lalhriatzuali Ralte ten a hmun atang hian Camp chhuakte an thlah a. Mahni-a hawna tur nei remchang lo te chu Bawngkawn YMA Hall leh Central YMA Office-ah te phurh thlen leh niin heta tang hian an remchang angin an haw ve leh a. Central YMA Office-ah hian SW&WCD Minister Lalrinpuii pawhin lo hmuakin Camp chhuak te hi kawmin a fuih bawk a ni.

Camper hi a tawp thlengin mipa 105 leh hmeichhia 14 an awm a. Tuna Camp chhuakte hi anmahni duhthu in PISGAH Reformatory Center, Thingsulthliah-ah mipa 2 leh Shakti Sadan, Maumual-ah hmeichhia 1 an lut a. A bak zawng hi mahni In lamah an haw thung a ni.

Hulhliap Program hi Camp chhuak In-a hawte tan la chhunzawm niin After Care Follow-up, Psycho-Social Counseelling hmangin volunteer Psychologist leh Social Worker mi 40 rualin an vil zui anga, thla thumk (3) chhung a tul angin an enzui dawn a ni. Sawrkar ruahman dan chuan hemi atanga damna change tan hian After Care Skill Training leh Handholding te tih chhunzawm tum a ni a. Hetiang tihna tur hmun remchang hi dap mek a ni.