Serchhip District-ah kum kalta chhungin HIV hrik kai mi 65 hmuhchhuah an ni

Sawrkar kum kalta 2024-2025 chhungin Mizoram-ah HIV hrik pai mi 2021 hmuhchhuah ni tawhin Serchhip District-ah pawh mi 65 hmuhchhuah an ni tawh a, HIV hrik kai hmuhchhuah thar zingah hian mipa tam zawkin tleirawl ten HIV leh AIDS natna chungchang an hriatchian lehzual theih nan inzirtirna kalpui tum a ni.

Nimin khan Serchhip DC Meeting Hall-ah Serchhip District AIDS Prevention and Control Committee (DAPCC) chu an Chairman leh Bawrhsap Paul L. Khuma kaihhruaiin an thukhawm a, he huna tarlan a nih danin Sawrkar kum kalta 2024-2025 chhung khan Serchhip District-ah HIV hrikpai mi 65 hmuhchhuah an ni a, an zinga mi pathum hi nu naupai an enfiahna atanga hmuhchhuah niin midang zawng hi mipui nawlpui enfiahna atanga kai an ni thung a, nikum chhunga HIV hri kai hmuhchhuah thar mi 65 zinga 50 hi mipa niin midang 15 hmeichhia an ni thung a. HIV kai thar hmuhchhuah zingah hian Mipat hmeichhiatna hman atanga kai leh hriau inhmantawm atanga kai hi mi 30 ve ve an awm bawk a ni. Hetihlai hian Mizoram pum huapin kum 2024-2025 chhung khan HIV hrik pai mi 2021 hmuhchhuah an ni a, heng zinga mi 110 hi nu naupai thisen endik atanga hmuhchhuah a ni a, Mipat hmeichhiatna atanga kai hi 1302 (68.13%) niin hriau inhmantawm atanga kai hi 559 (29.25%) an ni bawk.

Nimin-a thutkhawm ah hian District Integrated Strategy for HIV and AIDS (DISHA) kalpui a nih dan te, Serchhip DAPCC hmalakna leh hmachhawpte ngaihthlak a ni a. Tleirawl kum 13 atanga kum 17 zingah HIV/AIDS leh mipat hmeichhiatna atanga natna inkaichhawn theih te a darh zel lohna tura theihtawpa tan lak niin an pual hian School Education te nena thawkho in Awareness Campaign ngawrh taka kalpui thin a ni a. Kumin ah pawh Red Ribbon Quiz neih leh tur niin Class 8, 9 leh 11 zirlai te zingah Quiz hi School, District leh State pum huapa neih a ni ang.

He thutkhawm ah hian Serchhip District chhunga Red Ribbon Quiz neih dan tur rel niin mahni School theuhah August ni 15, 2025-ah online a neih a ni dawn a. District chhunga School 50 aia tlem lo tel tura beisei an ni. School titha zual 10 thlanchhuahte chuan District pum huapa inelna an hmachhawn anga, September ni 2, 2025 (Nilaini)-ah Serchhip DC Pisapui Hall-ah inelna hi neih leh tur niin heta titha te hi Serchhip District aiawhin State pum huap inelna ah an tel leh dawn a ni. Nimin thutkhawm ah hian Serchhip SP Gavit Gogna bakah School Education Department, Health Department, I&PR Department leh Official dang te an tel a ni.