Sawrkar-a GST tam zawk a luh theih dan tur ngaihtuah

Mizoram Resource Mobilisation Committee (MRMC) hnuaia Sub-Committee on Tax and Non-Tax chu nimin khan thukhawmin Mizoram Sawrkar-a GST tam zawk a luh theih dan tur an ngaihtuah.

He thutkhawm hi an Chairman Haukhuma Hauzel hovim a Pisa-ah neih a ni a, Meeting-ah hian Mizoram Sawrkara GST tam zawk a luh theihna turin Taxation Department thuamchak a pawimawh nia hriat a ni a, a bik takin Intelligence leh Enforcement Wing te tichak tura sawrkar ngen tha tih a ni. Taxation Department lam pawh an Work force neihsa ang ang hmanga hna tam zawk thawk thei tura insiamrem tura ngen tha an tih bakah an hnathawh tichak turin a tam thei ang bera IT hmang tangkai turin thurawn pek tha an ti bawk. Hei bakah hian Sawrkar-a Department hrang hrang, Works khawih thintute pawh sawrkara GST a luh tam theihna tur zawnga hnathawh dan ngaihtuah thin tura ngen an rel a, hei bakah hian mipui ten awlsam zawka chhiah an pek theih nan Aizawl khawpui chhung Sawrkar building hmun remchang laiahte mipuite tan Taxation Department Site Office hawng turin thurawn pek an rel bawk.

Mizoram Resource Mobilisation Committee (MRMC) Sub-Committee on Tax and Non-Tax thukhawm hian GST registration nei tawh ten tuna chhiah an pek aia tam an pek theih nan te leh registration siam ve lo, kum khata cheng nuai 20 chuang lalut tam zawk ziahluh an nih theih nan nasa lehzuala hmalak nise, Service tam zawk entirnan Catering te, Picnic Spot, Resort leh a dangte GST Registration neitu sumdawng te chu an dawr chungah emaw, hmuh awlsam theih tura an registration number te tarlang tura hriattir nise an ti bawk.