Ruihhlo vanga thi tam tawh

Mizoram-ah kum 1984 atanga kumin June ni 18 thleng khan ruihhlo vanga thi mi 1,912 an awm tawh a. Hetihlai hian ruihhlo ngai enkawlna Mizoram-ah 46 a awm mek.

Excise & Narcotics Department (END) chhinchhiah danin kumin chhungin Mizoram-ah ruihhlo vanga thi mi 33 an awm tawh a. Ruihhlo vanga thite hi mipa 28 leh hmeichhia panga an ni a, Heroin leh damdawi dang tihpawlh hmansual vanga thi an ni. Nikum chhung khan ruihhlo hmansual vanga thi mi 67 an awm a, mipa 58 leh hmeichhia pakua an ni a. Ruihhlo ti thinte thihpui tam ber hi Heroin niin midang hi Heroin leh ruihhlo dang tikawpte an ni.

Kum 1984 atanga kumin thlengin Mizoram-ah ruihhlo vanga thi mi 1,912 an awm tawh a, chung zinga 1,679 chu mipa niin hmeichhia 233 an awm bawk a. Chhinchhiahna atanga a lan danin kum 2004 kha ruihhlo vanga thi an tam ber kum a ni a, hemi kum hian damdawi hmansual vangin mi 143 an thi a ni.

Hetihlai hian Social Welfare Department-in a hriat theih chinah Mizoram-ah ruihhlo ngai enkawlna hmun 46 a awm mek a, chung zinga Center 11 te chuan Ministry of Social Justice & Empowerment atangin Fund an dawng thin a. Jordan Center, Sethawn, De-addiction Center atana hman reng thin chu tunah hian Afrer Care Skill Development Center atan kalpui tura ruahman mek a nia, Kohhran lam ten enkawl hna an thawk thei em tih zawh mek an ni a, PCI leh BCM te biak niin anni hian an kalpui theih loh chuan sawrkarin a enkawl hna a chhunzawm ang.