Child Marriage Free India Campaign neih mek a ni

Sawrkar laipui bultumin Bal Vivah Mukt Bharat-Child Marriage Free India Campaign chu nikum November 27 atang khan ramchhung hmun hrang hrangah kalpui a ni.

Bal Vivah Mukt Bharat-Child Marriage Free India Campaign hi Mizoram-ah chuan Women and Child Development Department chuan kalpuiin Hmeichhia kum 18 an tlin hma leh mipa kum 21 an tlin hmaa inneihtir an nih loh nan kawng hrang hrangin zirtirna an pe thin a. India ram hmun tam takah naupang (kum tling lo) inneihtir a la hluar hle laiin Mizoram-ah erawh chuan tihluihna ni lovin nau an pai avang te, an inruk (elope) avangte leh inngaihzawnna in a hrinchhuah thildang hrang hrang avangte in nu leh pa leh an chhungten an suihrem a, man leh mual an inhlan leh mai thin a. Hei hi khawtlang nunah suala ngaih em em ni lo mah se thil tha lo, naupangte hmakhua tichhetu a nih mai bakah dan mithmuhah thil sual a nih avangin fimkhur a ngai tih mithiam te chuan an sawi a ni.

State Hub for Empowerment of Women (SHEW), Directorate of Women & Child Development (WCD)-in Mission Shakti hnuaia hmalakna kal zelah nimin khan kum tling lova inneih khapna dan chung-chang inhrilhhriatna, ‘Sensitization Programme on the Prohibition of Child Marriage Act, 2006 (PCMA) for Child Marriage Prohibition Officers (CMPOs)’ hi Aizawl-a I&PR Conference Hall-ah neih a ni bawk a. He hunah hian naupangin a hun hmaa nupui/pasal an neih hian an zirna, hriselna, eizawnna, ngaihtuahnate nasa takin a nghawng a, an theihna leh an thlen chinte tithuanawpin hmakhaw eng tak nei turte nun a tichhia a, nu leh pa, chhungte leh khawtlang mipuiten hetiang inneihna thleng lo tura venpuina kawngah mawhphurhna pawimawh tak an neih thu tarlan a ni. 

Hetianga naupang inneihtir an nih hian, inneihtirtu, hriatpuitu leh a puitute chu ‘The Prohibition of Child Marriage Act, 2006’ hmangin kum hnih (2) chhung hrehawm taka lung In tantir leh cheng nuai khat thleng chawia hrem theih an ni a. Mipa puitlingin hmeichhia kum 18 hnuailam nupui-a a neih chuan hetiang tho hian hrem theih a ni bawk.

Hei bakah hian hetiang thil thleng hria emaw, hmutu chuan Child Helpline Tollfree Number 1098-ah emaw, Women Helpline Tollfree Number 181-ah emaw, Child Marriage Prohibition Officer District & Block tina WCD Office-ah te, Village Council Secretary leh Community Watch Group hrang hrangte hnenah a thlen theih reng a nih thu tarlan a ni bawk a. PCMA, 2006 hman a nih atang hian ‘Child Marriage’ awm zat hi a chanve in a tlakhniam thu pawh tarlan niin, NFHS-5 atanga hmuh dan chuan kum 2006-ah khan Child Marriage hi 46% a awm a, kum 2019-21 ah chuan 23.3%-ah a tlahniam a. Khawpui aiin thingtlang ah kum tling lova inneihna hi a tam zawk bawk a ni.