Tui Bill chawitir loh phut

Chakma Autonomous District Council (CADC) huamchhunga khawtlang huap pawl lian pathum te chuan PHE Department-ah dilna intawm thehlutin, kumin June thla chhunga Tui chhiah (Bill) an chawi tur awl turin an ngen.

    CADC huamchhunga pawl pathum- Young Chakma Association, Mizoram Chakma Students' Union leh Chakma Mahila Samiti bakah veng hrang hranga WATSAN Committee-te chuan Chawngte PHE SDO kaltlangin Lawngtlai PHE Division-a EE hnenah ngenna an thehlut a, kumin June thla chhung khan Kamalanagar-a Department tuisem hmangtu 90% vel chuan tui an dawng lo hrim hrim nia sawiin, a bak 10% te pawhin hman tlak tui thianghlim leh fim an dawng lo niin an sawi a. Heng pawl hrang hrangte hian tui thianghlim an dawn theihna tura hmalakna Chawngte Rural Drinking Water Supply Plant tihpuitlin a la ni lo chu tui an dawn mumal theih loh chhanah puhin, The Mizoram Water Supplies (Control) Act, 2024 section 19 leh The Mizoram Water Supplies (Control) Rules, 2006 Clause 7 hnuaia Sub-Clause 23 tan chhanin chhungtin ten June thla chhunga tui chhiah an chawi tur chu awl turin an ngen a ni.