Ruihhlo laka inven dan hmeichhia ten zirho

Midang zirtir chhawng tura ruat Kohhran hmeichhia leh Hmeichhe NGO-te tana ruihhlo hmansual laka inven dan inzirtirna ni hnih awh chu nimin khan zawhfel niin he Training kharna hun hi Social Welfare, Women & Child Development Minister Lalrinpuii chuan a hmanpui a ni.

Mizoram Social Defence and Rehabilitation Board, Directorate of Social Welfare leh Working Committee on Ruihhlo Do-te tangkawp buatsaih he Training kharna inkhawm I&PR Conference Hall, Lianchhiari Run-a neih ah hian Social Welfare Minister Lalrinpuii chuan ruihhlo leh a kaihhnawih hrang hrangte’n kan ram a run mek laia damkhawchhuahna tura hmeichhiate pawimawhzia sawiin, hemi chungchanga sawrkar hmalaknate a tarlang a. Ruihhlo do chu sawrkar in policy-a a neih avangin he lamah hian ke a pen nasa dawn tih a sawi a. Kan ram hi chhan tlak a la awm avangin ruihhlo chungchang inhrilhhriatna leh tichhin lo tura inven dan inzirtir tam a pawimawh thu sawiin, kalkhawmte chu an thil zirte tangkai taka hmang chhunzawm turin duhsakna a hlan a ni.

Ruihhlo chungchang inzirtirna hunah hian Mara Chano Py (MCHP), Seventh Day Adventist, UPC (Mizoram), MHIP General Headquarters, Evangelical Church of Maraland, Central Kohhran Hmeichhia, Mizoram Baptist Kohhran Hmeichhe Pawl, UPC (NEI), Salvation Army leh Lai Women Association aiawhte telin, an Pawl hmalakna, harsatna tawh leh hmachhawpte an sawi a. Ruihhlo do kawnga an hmalakna puih nan Inkaihhruaina Bu leh sumfai hlan an ni bawk.