CMS (Middle Section) kalna sawn rih tum a ni

Serchhip Dinthar Veng-a Chawngbuangi Memorial School (Middle Section) chu Serchhip Chhim Veng-a Govt. Modern M/S Building-ah Class kal rih tura ruahman a ni.
Tunhnaia ruahsur nasa leh leimin ah khan CMS Serchhip thlanglam chu nasa taka a che a, an Choka leh inthiarna thenkhat te a chhiat bakah Building thenkhat pawh luah atana him rih chiah lo te pawh a awm a, hei bakah hian an kawtzawl pawh min tel bawkin naupang tam tak tan a him lo thei bawk a. Hei vang hian dan pangngaia School kal theih ni lovin tun dinhmunah zirlaite chu chawhma leh chawhnu lamah a inchhawkin kaltir mek an ni.

He harsatna hi tunhnai khan Chief Minister hnenah thlen niin a tul anga hma lo la turin Serchhip Bawrhsap chu a hriattir nghal a, zirlai ten zirna an chhunzawm theih dan tur hrang hrang ngaihtuah niin Chhim Veng-a School Building pahnih, Govt. Chhim Veng P/S leh Govt. Modern M/S te chu a hmunah enfiah a nih bakah Nursing School Building chu luah tura rawtna a awm bawk a, amaherawh chu Primary School hi a tet deuh avang leh Nursing School Building hi cheitha tura hmalak mek a nih avangin a rem lo a, hei vang hian CMS-a Adhoc School ni chin, Middle Section chu Govt. Modern M/S ah hian Class kaltir tura ruahman a ni, hemi chungchang hi Serchhip Chhim Veng VC te pawhin ngaihtuah tawhin School dang an neih hma chu luah an remtih thu an sawi nia thudawn a ni. Govt. Modern M/S-ah hian zirlai an awm loh avangin hun rei tak Class kalpui ni tawh lovin mimal in man chawiin an luah a, In luah mektute nen ruahmanna la siam tur a ni ang.

Chawngbuangi Memorial School (Middle Section)-ah hian Class V atanga VIII awmin zirlai 180 vel an awm mek a, Primary Section-ah hian zirlai 261 awmin anni erawh hi chu an School Building pangngai ah an kal zui dawn thung a ni.