Phurrit chhawk zangkhai nan MUHCS duan a ni tih sawi

Health Minister Lalrinpuii chuan Mizoram Universal Health Care Scheme (MUHCS) chu damloh nikhuaa inenkawlna senso phurrit ni thin chhawk zangkhaina tura duan a nih thu a sawi.

Aizawl khawpui-a Private Hospital zinga MUHCS zawm thar Kidney 360° Superspeciality Clinic & Dialysis Centre, Bazar Bungkawn; Nazareth Hospital, Chaltlang; Nazareth Hospital, Ramhlun leh Redeem Hospital, College Veng te nimin-a a tlawhna ah Health Minister chuan he thu hi sawiin, MUHCS tihlawhtling tur hian Sawrkar Hospital hrang hrangte theihtawpa thuamthat chhoh mek an nih thu a sawi a. Sawrkar Hospital-ten damlo enkawl kawngah min dawl zawh loh avanga Private Hospital-te an pawimawh thu sawiin, nimin-a a tlawh Private Hospital te'n mipuite mamawhna hriaa hmangaihna leh rawngbawlna rilru pu chunga MUHCS an zawm chu lawmawm a tih thu a sawi a. Mipuite pawhin MUHCS zawmtu Hospital-te sum pe lova (Cashless) inenkawl tura an pan zui zel a beisei thu a sawi a. Mipuite tana Scheme tha tak chhawpchhuak thei tura thawktute leh sawrkar inpekna chu fakawm a tih thu sawiin, Pensioner pangngaiin a huam loh, Central Scheme hnuaia hlawh la thawktu hrang hrangte pawhin zawm an dil thu tarlangin, Sawrkar chuan a tlin tawk ang zelin dilna lutte a ngaihtuah thin tih a sawi bawk.

Kidney 360° Superspeciality Clinic & Dialysis Centre-ah hian Dialysis khum 6 a awm a, damlo 595 chu MUHCS hnuaiah Cashless-in an enkawl tawh a, Dialysis mamawh an tam avangin booking tih lawk a ngai a ni. Nazareth Hospital leh Redeem Hospital-ah te pawh General Ward, Semi-Cabin leh Private Cabin thianghlim leh changtlung tak a awm a, heng Hospital-ah te hian MUHCS-a inziaklut tawhte tan Cashless in a inen-kawl theih a ni.