CM hovin Remna ni hmang

Remna ni vawi 39-na chu nimin khan Aizawl Lammual-ah MZP General Hqrs. huaihawtin lawm a ni a, he hun hi Chief Minister Lalduhoma chuan khuallian niin a hmanpui a ni.

Remna ni puala hun hman ah hian Chief Minister Lalduhoma chuan ‘Remna Ni Flag’ pawtpharhin khawvel hmun hrang hranga cheng Zofate chibai a buk a. Remna Ni chu MZP President-in a ngen angin hmun khat ah lungrual takin hmangza thei ila a duh thu a sawi a. “Indona hi a man a to em em a, fahrah leh hmeithai a siam a, ralthuam siam nan sum leh pai tam tak a luangral a. Zalenna a bo a, ram hmasawnna a tithuanawp a, a awmsa pawh a tichhe thin. Remna leh muanna hlutzia hre tawh hnam kan nih ang ngeiin kan ramah remna a awm zel theih nan sawrkar chuan theihtawp kan chhuah dawn a ni,” a ti.

Inkalpawhna kawngah Mizoram chhim lam leh hmar lam atangin nasa takin hma kan sawn dawn thu pawh Chief Minister chuan sawiin, “Hnamdang, Sakhaw dangte nen tun aia hnai zawkin kan khawsa chho zel dawn. eng kawngah pawh hian remna i vawng nung thiam ang u,” a ti a. Mizo Nationalism chu vai huat tihna a ni lo tih pawh sawiin, “Nationalism dik tak chu hnamdang te thiana siam a, an hmasawn anga hmasawn ve a, a tul anga an hnen atanga zir leh thawhpui a ni,” a ti a. “Central sawrkar nena kan inrem a, kan kal dun thiam a ngai. Mizoram tana a that phawt chuan Central-ah eng party pawh sawrkar se kan thawhpui thei tur a ni,” a ti bawk a. “Politics ah inremin awm ila, mawi lo taka inbeihna hi tibo ang u. Kan khawlai hi ralmuang rawh se, tuallai ah zurui awm suh se. Khawlaia buaina siam te hi bo rawh se. I titawp ang u. Mipa chu tuallaiah a inhrosa tur a ni ngai love. Thenawm khawveng te nen pawh inrem ang u,” a ti bawk.

Aizawl-a Remna ni lawmna hun hi MZP Vice President Dr. C. Lalremruata chuan kaihruaiin MZP President H. Lalthianghlima chuan Remna Ni hi tu ta bil mah a ni lo tih sawiin, a buaipuitu ah an tang mai tih a sawi bawk.