CM hovin CADS ruihhlo man sa tihral a ni

Central YMA hnuaia Central Anti Drugs Squad (CADS) ten kumin March ni 15 atanga June thla thlenga ruihhlo an man chu nimin khan tihral niin a vaiin cheng nuai 429.27 man vel zet a ni.

Central YMA Hall-a hemi puala hun buatsaih chu Chief Minister Lalduhoma’n hmanpuiin khawtlang nun siamthatna kawngah YMA te chu kan inghahna an ni tih sawiin, “Kan ramin YMA kan nei hi kan vannei em em a ni. Vawiina kan tihral zozai hi man lohvin awm ta se la, min va tichhe nasa dawn tak em,” a ti a. “Mamawh tam tak in nei tih kan hria a, ka theih ang angin ka lo tang ve ang. Ruihhlo do leh ngawlveite enkawl dam hi hna harsa tak a nih avangin Pathian rawn chunga kal a pawimawh hlein ka hria,” a ti a. Ngawlveite enkawlna chu chhawng thum anga kan kalpui chuan mumal leh nghet zawkin kan enkawl dam theih a rinawm thu leh chutianga kal dan tur chu an dap mek thu a sawi bawk.

He hunah hian Central YMA General SecretaryProf. Malsawmliana chuan Report pe in tun tuma ruihhlo tihral hi Heroin No. 4 hawng 861 leh Tictac 1498, Meth kg. 10, damdawi tablet 25383, Ganja kg 56, Codein bur 2805 bakah Zu tam tham tak an ni a, a vaiin cheng nuai 429.27 hu a ni. Kumin March ni 15 atangin CADS te hian ruihhlo kaihhnawihah mi 809 an man a, an zinga mi 440 Councelling an pe a, mi 37 chu Home-ah an dah a, mi 48 te Excise kutah an hlan bakah Police kutah 4 an hlan a ni.

Nimin-a hemi puala hun hman hi Central YMA President Lalhmachhuana chuan a kaihruai a, inkhawm neih a nih hnu hian heng ruihhlo zinga thenkhat hi Central YMA Office Tual-ah Chief Minister hian tuiah a chiah ral a, tihral tur hi a tam tham avang leh khaw chhunga tihral a him loh theih avangin a bang zawng chu CADS Member ten hmundangah an tiral zui a ni.