DISHA chungchang inzirtirna neih a ni

Nimin khan Kolasib-ah District Development Coordination and Monitoring Committees (DISHA) Study Group thutkhawm neiin DISHA chungchanga hriat tur pawimawh hrang hrang inzirtir a ni.

He thutkhawm Kolasib DC Conference Hall-a neih hi Kolasib Bawrhsap Robert C. Lalhmangaiha chuan kaihruaiin National Institute of Labour Economic, Research and Development NILERD, Niti Aayog-a Adviser Dr. Smarajit Chakraborty chuan DISHA nihphung leh a thiltum te sawiin, India ram District tinah a awm thu a sawi a, thla thum (3) dan-ah thutkhawm neih thin a nih thu leh Member of Parliament (Lok Sabha) in kaihruaiin DC chu Member Secretary an ni a, State Level-a Chief Minister kaihhruaina hnuaia pawh State thenkhat chuan an kalpui tawh thin thu a sawi bawk.

Dr. Smarajit Chakraborty chuan Sawrkar in Scheme hrang hrang a neih ah a Scheme in a phak loh leh chinfel ngai tam tak a awm thin tih sawiin, chung harsatna hrang hrangte thlenna leh sawihona chu DISHA niin, a chinfel dan tur leh hmalak dan tur chu Meeting chuan ngaihtuah thin a nih thu a sawi a; MP te kaltlanga Parliament thlenga an harsatna te putluh theihna hmanraw pawimawh tak a nih thu pawh sawiin, DISHA Dashboard leh Central-a DISHA Monitoring-ah te harsatna leh Scheme hrang hrang kalhmang te chiang zawka en theihna a awm thu a tarlang.

DISHA Ministry of Rural Development hnuaia din a ni a. DISHA hnuaia Meeting hrang hrangte hian Central sawrkar Scheme hrang hrang te khaikhawmin chung Scheme a harsatna leh hmalak dan turte chu sawiho a ni thin a. Member of Parliament Chairman-na hnuaia heng thutkhawmna te hi kalpui thin a nih avangin Scheme thenkhat a harsatna lian zual te chu DISHA hmanga Parliament beng thleng thei tura ruahman a ni.