National Highway Vairengte to Sairang inkar chungchang Mizoram PWD ten an sawifiah

Mizoram sawrkar-a Public Works Department (PWD) chuan National Highway Vairengte to Sairang chungchangah thuchhuah siamin NHIDC, Executive Director, Virender Jakhar-a thusawi chu a dik tawk lo niin an sawi.

Mizoram PWD thuchhuah chuan Vairengte - Sairang inkar kawng chu Ministry of Road Transport and Highways (MoRTH) Gazette 2209(E) dated 03.07.2020-a chhuah angin NHIDCL enkawl tura tih a nih thu leh Bilkhawthlir - Kolasib leh Kawnpui - Khamrang kawng bik hi kum 2019-a Resurfacing Sanction hmuh a nih laiin a kawng siam hna hi thawh zawh a la nih loh vangin PWD chuan NHIDCL-ah a transfer nghal lova, hna thawh zawh anih hian PWD chuan Resurfacing tihna tur sum hi NHIDCL hnenah hlan tumin vawi tam tak hriattirna a thawn a, Meeting te neihpui an nih laiin NHIDCL chuan Defect Liability Period (DLP) zawh hma chuan an la zui duh ta lo niin an sawi a. “DLP zawh hnu leh Contract pakhat zawk terminate a nih hnuah PWD chuan NHIDCL ah transfer an tum leh a, mahse, an la duh ta chuang lo a ni. A kawng hi NHIDCL lak tura Gazette a chhuah tawh a nih avangin, PWD hian a siamthatna tur estimate te siam thin mahse, MoRTH lam hian an sanction thei lo a, Mizoram Sawrkar chuan Zoram tan a kawng pawimawh a ni tih hriain State pawisa hmangin theih ang angin a enkawl zui ta a ni,” an ti.

October 18, 2024-a Chief Minister Lalduhoma hova Meeting neih ah inhlan hun tur tihfel a nih thu pawh PWD chuan sawiin, “January 2025-ah inhlanchhawng tura inrem a ni. He inremna ang hian EE, NH Division-III chuan 03.01.2025 khan inhlanna document chu NHIDCL GM, Kolasib kutah a thawnlut ta a. Helai inkar kawng hi NHIDCL ten an la Tender mek avang leh kawng a that loh avangin State Sawrkar chuan 2024-25 Financial Year chhungin cheng nuai 200 a sanction a; 2025-26 chhungin cheng nuai 111 chuang kawngchhia thawmthat nan a sanction leh bawk a ni,” an ti. National Highway hi MoRTH ta liau liau a nih thu pawh sawiin, Construction leh Maintenance Fund pawh an tum vek nih avangin Chief Minister Lalduhoma chuan May 28, 2025 khan Union Minister Nitin Gadkari hnenah helai kawng hi tha taka siamsak turin a thlen tih an sawi a. He hunah hian NHIDCL Director (Technical) chuan Union Minister leh Chief Minister hnenah helai kawng inkar hi PWD atangin NHIDCL-ah transfer a nih tawh thu hrilhin, Union Minister hian NHIDCL Director (Technical) chu Bilkhawthlir - Kolasib leh Kawnpui - Khamrang kawng a hmuna tlawh a, motor tana tlan awlsam tura siam nghal turin a ti nghal nghe nghe bawk niin an sawi a. He kawng chungchangah hian Mizoram Chief Secretary in NHIDCL hotute July 4, 2025-a a koh tumin an kawng enkawl lai a nih tawh thu leh Bilkhawthlir - Kolasib leh Kawnpui - Khamrang kawng enkawlna tur atan Contract Agreement an sign pui tawh thu NHIDCL lam chuan an thlen thu leh hna pawh Contractor in an tan nghal thuai tur thu an sawi nghal bawk niin an sawi a. Hei hi NHIDCL in Chief Secretary hnena an report dan a nih avangin an Executive Director in PWD enkawl lai ni anga a sawi chu thudik tawk lo leh felhlel deuh a nih thu an tarlang a ni.