Myanmar raltlante tana ‘biometric enrolment’ July thla tawp hian bultan hman tum a ni

Sawrkar laipui duhdan anga Myanmar raltlante chhinchhiah hna, ‘biometric enrolment’ chu July thla tawp hian bultan hman hram tum a ni a, he hna thawh nan hian cheng nuai 38 ruahman chhin a ni.

Home Department-a thawktute sawi danin biometric enrollment tihna atan hian hmanrua leh tih tur tul engemaw zat a awm avangin duh anga thawh zung zung a harsa a. Sawrkar laipui chuan raltlante chhinchhiah hna hi online hmanga kalpui tura a tih avangin Internet Service awm thatna hmunah te hmalak hmasak an tum tih an sawi a ni. Hetihlai hian raltlan camp awmna tam tak chu hmun kilkhawr tak takte a nih avangin harsatna a awm dawn tih sawiin, internet awmna hmun leh tlawhpawh awlsam deuhah hmalak phawt a ngai dawn tih an sawi a, internet a that miau loh chuan Offline hmanga tih pawh a tul mai thei niin an sawi bawk. 

Home Department-a thawktute chuan raltlan chu ni tin an chet reng avangin a zat chiah hriat a har tih sawiin, lut leh chhuak an awm reng niin an sawi a, chhinchhiahna hnuhnung berah chuan Myanmar raltlan hi Mizoram-ah mi 27751 an awm thu leh tunhnaia chi leh chi inkar buaina avanga Mizoram lutte pawh chhinchhiahna ah hian chhinchhiah tel ve an ngai dawn tih an sawi a. Myanmar raltlan chhinchhiah hna thawhna atan hian cheng nuai 38 ruahman chhin phawt niin a daih bak chu ngaihtuah chhunzawm zel tur a ni tih an sawi a, “Myanmar raltlan chhinchhiah hna thawhna atan hian Computer, Web Camera leh hmanraw dang engemaw zat lei a ngai dawn a. A senso tur hi sawrkar laipui tum tur ni mah se central lam an hmanhmawh tawh avangin sum hi min rawn pe lo mah se Mizoram sawrkar sum hmanga hna lo tan phawt a ngai dawn a. Tuna senso tura ruahman cheng nuai 38 hi chuan a daih a rinawm loh a, sawrkar pawhin a ngaihtuah chhunzawm zel turah kan ngai a ni,” an ti a. Hemi atana an mamawh leh sum senso ngaite hriattir tura an tih angin Aizawl DC leh Saitual DC chuan an mamawh zat tur (requirement) an thehlut tawh a, District dang DC te chuan he thu buatsaih lai thleng hi chuan an la thehlut lo nia hriat a ni. 

Thudawn danin sawrkar laipui chuan Myanmar raltlante chhinchhiah tur hian Mizoram sawrkar chu tum engemaw zat a rawn hriattir tawh a, mahse Mizoram sawrkar hian chhuanlam eng eng emaw siamin a lo hnar thin a. Sawrkar laipuiin raltlante chhinchiahna tura a ruahman Embassy form chu raltlante tan a him lo thei nia sawiin, chhinchhiahna dang hmang turin sawrkar laipui chu a ngen a. Embassy form-ah hi chuan Myanmar sawrkarin raltlante hming leh nihna a hriat theih vek dawn avangin raltlante tan hian a him lo niin an sawi a ni. Mizoram sawrkar ngenna hi pawmin sawrkar laipui chuan Foreigners Identification Portal (FIP) hmanga chhinchhiah turin ruahmanna a rawn siam leh a ni.