The Mizoram (Maintenance of Household Registers) Bill 2019-ah hmalak a ni dawn

The Mizoram (Maintenance of Household Registers) Bill 2019 chu kum 6 hnuah President pawmpuina hmuh a nih theih nan Sawrkar laipui chuan hma a la dawn.

Chief Minister Lalduhoma chuan tunhnaia New Delhi a zinna-ah Union Home Minister Amit Shah hmuin Home Minister hian India President hnena la tang mek The Mizoram (Maintenance of Household Registers) Bill 2019 chu President pawmpuina hmuh a nih vat theihna tura a lo bawhzui tur thu a sawi a, heng bakah hian thil pawimawh hrang hrang Mizoram hmasawnna tur an sawi bawk.

The Mizoram (Maintenance of Household Registers) Bill hi sawrkar hmasa hunlai March ni 18, 2019 khan khatih laia Chief Minister Zoramthanga kaihhruaiin Assembly thutkhawm ah pass a ni a, a hunlaia Larsap Jagdish Mukhi chuan Bill chu ramdang mi chungchang kaihhnawih a nih avangin President hnenah a lo thawn tawh a ni.

Chief Minister hlui Zoramthanga chuan kum 2019-a Bill a pharhna ah The Mizoram (Maintenance of Household Registers) Bill chu State sawrkar in awlsam taka ramdang mi leh tualchhung mi an hriat hran theihna tur a ni tih sawiin, dan lova lolut te leh State thenawm atanga dan phalloha lo lut te enfiahna tur awlsam a ni tih a sawi a, hei hi tualchhung mi tan a tangkai dawn tih a sawi bawk.