MUHCS-a inziaklut chhungkua 2,97,516 vel an awm

Mizoram sawrkar in kumin April ni 1 atanga a kalpui Mizoram Universal Healthcare Scheme (MUHCS) hnuaia inziahluh theih hun chu a tawp ta a, chhungkaw 2,97,516 vel an inziaklut a. August 2025 chhung khawngaihna hun (grace period) hawng lehin inziahluh leh theih a ni ang.

June thla tawp thlenga MUHCS-a inziaklut zingah hian a tam ber chu a hranpaa inziahluh ngai lo PMJAY chhungkua, Golden Card nei te an ni a, anni ho hi chu MUHCS huamtir nghal niin an vaiin chhungkaw 2,19,000 an ni a. A dawttu chu sawrkar hnathawk niin mi 43,470 ziahluh an ni bawk a. Sawrkar hnathawkte pawh hi a hranpaa inziahluh ngai lo leh thla tin an hlawh atangin MUHCS atan thawhtir an ni a, an hnathawh azirin an thawh zat a inang lo thung a ni.

Mipui nawlpui zingah a tawp dawn hnaia inziaklut pung ve hretin chhungkaw 12,989 an inziaklut a, mipui tan hian inziahluh man chi hrang hrang siam niin Rs. 2,500 manah chhungkaw 11,283; Rs 5,000 manah chhungkaw 1,088 leh Rs 10,000 manah chhungkaw 618 an inziaklut a. Pensioner zingah chhungkaw 10,057 an inziak-lutin, Category A-ah chhungkaw 8,298 leh Category B-ah chhungkaw 1,759 an lut a ni.

Centrally Sponsored Scheme (CSS) hnuaia thawk chhungkaw 12,000 vel an inziak-lut a ngaih a ni bawk a. CSS hnuaia thawk inziaklut zat chiah hriat theih a la ni lo a, hei vang hian MUHCS-a chhungkaw inziaklut zat dik tak hriat theih a la ni lo bawk a ni.

MUHCS-a inziahluh hun hi June 30, 2025 khan a tawp a, tunah chuan inziahluhna hun hi khar ni rihin ruahmanna siam lawk angin August 2025 chhung ‘Grace Period’ hawn a ni dawn a. Grace period-ah hi chuan a hmaa chawi ngai let zel chawi a ngai tawh dawn a ni. Tun tum bak hi sawrkar kum kal mekah MUHCS-a inziahluhna hun hawn a ni tawh dawn lo a ni.