Chief Minister in Mizoram mamawhte a thlen

India hmarchhak State pasarih-a Chief Minister leh an aiawhte chu nimin khan 16th Finance Commission member te nen inkawmin he hunah hian Mizoram Chief Minister Lalduhoma chuan Mizoram mamawh hrang hrang a thlen a ni.

He inkawmna hi New Delhi-a Imperial Hotel-ah neih a ni a, Chief Minister Lalduhoma chuan State sum bawm lian ber (devolution of taxes) tihpun chungchang thlenin, Central sawrkarin State sawrkar hnena pawisa a pek dawnin mihring tam lam chu criteria pakhat a nih thu leh hemi avang hian Mizoram ang mihring tlemnaah chuan kan tuar thin niin a thlen a, hemi kaltlanga kan sum hmuh tihpun a nih theihna tur criteria a dah tel turin a thlen bawk a ni. Hei bakah hian Chhiatrupna atana sum inpek thin (disaster risk index) hnuaiah chhiatna lian tham (major disaster) lirnghing, khawkheng, Cyclone leh tuilian dah thin a ni tih pawh sawiin, Mizoramin a tawrh nasat leimin, ram kang leh ruahbawhawk avanga chhiatna thleng te telh ve tura ngenna a thlen bawk a ni.

Mizoram chu tlangram chhengchhia leh inkalpawh harsatna anih avangin bungraw phurhna senso (transportation cost) chhut tel thin tura ngenna pawh Chief Minister hian thlenin, District Council te tana sum tam zawk pe tura ngenna leh Rural Local Body Grant chhunzawm zel tura ngenna pawh a thil thlen langsar zingah hian a tel a ni.

Kum nga chhung atana ram danpui Article 280-na anga Central sawrkar leh state sawrkar ten sum an insem dan tur duangtu 16-na, 16th Finance Commission rawtna (recommendation) hi nakum April ni 1 atanga hman tan tur a ni a. 16th Finance Commission hian Mizoram pawh rawn tlawh tawhin, an hmalakna kal zelah nimin khan hmarchhak State Chief Minister te nena inkawmna hun hi an buatsaih a. Mizoram Chief Minister bakah Meghalaya Chief Minister Conrad Sangma te, Tripura Finance Minister Pranajit Singha Roy bakah State dang Chief Minister aiawh leh Official pawimawhte an tel a. Northeast State aiawhte hian dilna intawm, Joint Memorandum chu 16th Finance Commission hnenah hian an thehlut nghal a ni.