Kum 2025-2026 a Mizoram GST hmuh a tlem chhan Contract hnathawh a tlem vang niin sawi

Taxation Department-in kumin sawrkar kum kal mek, 2025-2026-a Goods & Services Tax (GST) an khawn chu kum dang aiin an hmu tlem a. Sum hmuh a tlem chhan hi contract hnathawh a tlem vang niin Taxation Department thawktute chuan an sawi.

Sawrkar laipuiin tunhnaia State hrang hrangte Goods and Services Tax khawn zat a tarlannaah Mizoram GST khawn chuan nikum a phak lo hle a, nikum June thlenga sum hmuh aiin kumin-a sum hmuh hi vbc.12 in a tlem zawk a. Sawrkar laipui chhinchhiah dan chuan nikum June leh kumin June thleng khaikhinin target tlin lo State 10 awmin an target aia khawn tam zawk State 23 an awm thung a. Sum hmu tlem ber zingah Mizoram hi a tel a ni. Hemi chungchang ah hian Taxation Commissioner HK. Lalhawngliana chuan Mizoram GST hmuh chu contract hnathawh ah a innghah avangin sum hmuh hi a tlem tih a sawi a. “Kan GST hmuh hi State dangte anga sumdawng hovah innghat lovin contract hnathawhah a innghat nasa a. Nikum lamah kha chuan contract hna lian pui pui thawh a tam a, chuta tanga an sum chhunluh kha a tam a. Kumin ah erawh chuan khang hnathawh kha a tlem avangin kan hmu tlem ta a ni ber,” a ti bawk.

GST atanga sum hmuh tlem chhanah hian sawrkar dem ngawt theih a ni lo tih sawi bawkin, “Nikum lama contract pek tawh hna la thawk mumal lo te an awm a, chubakah hnathawk mek; mahse, bill la la lo te an awm bawk a. Heng contract hnathawkte hian GST an chhunluh hunah chuan kan sum hmuh hi a la sang thei a ni,” tiin GST-ah sum lut tam lo mah se VAT lamah erawh chuan a lut tha niin a sawi a. Hei bakah hian contract hnathawk ni lo sumdawng atang chuan GST hi an hmu tha niin a sawi bawk.

Chhiah hmuh that nan Taxation Department chu siamthat an tum tih sawiin Taxation Commissioner chuan, “Tuna Aizawl-a Zonal Office 4 awm hi siam danglam kan tum a. A hmaa Zonal Office ten engkim an buaipui thin ang kha ni tawh lovin Zonal Office pahnih in Registration leh Administration an khawih tawh anga. A dang Zonal pahnih a awm te kha Wing 5-ah thenin Policy & Law, Intelligence, Enforcement, Audit leh Recovery an thawk tawh dawn a. Hemi atan hian sawrkar pawhin phalna min tawh a ni,” a ti bawk.

Kumin 2025-2026 a Sawrkar in Taxation Department sum hmuh tura a ruahman (target) chu cheng vbc. 1370.50 a ni a, hei pawh hi harsatna dang a awm loh chuan tlin ngei an beisei tih Taxation Commissioner chuan a sawi bawk a. Kum kal tawh lamah pawh sawrkar in Chhiah an hmuh tura a beisei hi Taxation Department hi an an lo khum fo tawh bawk a ni.