Kuthnathawktute Ipte-a pawisa thun tlem berah puh

MNF Party chuan ZPM sawrkar chu kuthnathawktute Ipte-a pawisa thun tlem ber an nih thu an sawi.

Nimin-a thuchhuah an siamah MNF Party chuan June ni 30 khan Chief Minister, Lalduhoma chuan ‘ZPM sawrkar chu kuthnathawktute Ipte-a pawisa thun hnem ber’ a nih thu a sawi nia tarlangin, “A thu sawi hi belhchiandawllo, amah ngei pawhina a awih loh tur a ni a. Pu Lalduhoma hian eng tehna nge a hman tih hi MNF chuan a zawt a ni,” an ti a. MNF sawrkar liam ta khan SEDP ‘Pilot Project’ atan kum 2019-2020-ah Vawk vulhtu chhungkaw 220-te hnenah cheng nuai thum theuh, a vaiin Rs. 66,000,000/- an Ipte-ah a thun sak tih an sawi a. Ar ‘Broiler leh Rainbow Rooster’ vulhtu chhungkaw 800 hnenah Rs.150,000 theuh, a vaiin Rs. 120,000,000/- pein Sericulture hnuaiah chhungkaw 425 hnenah Rs. 150,000/- theuh, a vaiin Rs. 63,750,000/- kuthnathawktute Ipte-ah a thun sak bawk tih an sawi.

Hemi hnu hian hripui lêng, Covid-19 pandemic vangin SEDP chu chhunzawm theih ni rih lo mah se, kum 2021-2022 Financial Year atan SEDP hnuaiah kuthnathawktu chhungkaw 60,000 te tan cheng vbc. 150 pek an nih thu leh kum 2022-2023-ah cheng vbc. 150 pek leh niin kum 2023-2024 atana cheng vbc. 150 dah fel sa erawh chu MNF sawrkar khan a hmang hman ta lo niin an sawi a. “Chuti chungin kuthnathawktute bultanna tur leh an intunna tura tanpuina pek zat chu avaiin Rs. 3,249,750,000/- a ni,” an ti bawk.

MNF Party chuan Sawhthing lei kawngah ZPM sorkar a 'fail' chiang hle nia sawi bawkin, “Pass mark an hmu pha lo tih hi MNF chuan Chief Minister, Pu Lalduhoma leh a kaihhruai sawrkar hi a hriat tir duh a ni,” an ti bawk.