Mizoram Polytechnic ram luah man la fel thei lo; Tun thla ni 28-ah ngaihtuah leh tum a ni

Mizoram Polytechnic, Lunglei ram luahman chungchanga thubuai kal zelah Court-in Mizoram sawrkar chu cheng nuai 88.14 chawi turin ti mah se Supreme Court chuan July ni 28, 2025-ah hemi chungchang hi a ngaihtuah dawn nia sawi a ni a. MPL Principal chuan he ram chungchangah hian Inrinni khan FIR dang a thehlut ve leh bawk.

Mizoram Polytechnic Lunglei-a building thenkhat awmna hmunhma neitu nia inchhal Vanlaldawngliana, Theiriat-in Mizoram sawrkar a khinna thubuai kal zelah Mizoram Polytechnic Lunglei building pawimawh pasarih chu June 27, 2025 atang khan Court-in a kalhsak mek a, Lunglei District Court chuan Mizoram sawrkar chu July 21, 2025 ralhmaa Mizoram Polytechnic Lunglei ram neitu hnenah ram luah man cheng nuai 88.14 pe tlak turin a hriattir a. He thubuai hi July 14 khan Lunglei District Sr. Civil Judge chuan ngaihtuah lehin helai ram hi hralh a nih loh nan sawrkar Ukil chuan chawlhkar khat dang hun dil belh lehin July 21, 2025 thleng hun pawhsei sak leh a ni a. July ni 21-ah pawisa inpekfelna chu Court-a thehlut tura hriattir a ni bawk. MPL Principal Lalnuntluanga chuan July 14 khan he ram chungchanga thubuai hi Supreme Court-ah ngaihtuah a nih thu leh hemi tum hian zawhfel a nih loh avangin July 28-ah chhunzawm tura dah a nih thu a sawi bawk a. Court in chawlhkar khat hun a pek belh mek hi pawhsei dil leh turin sawrkar chuan Ukil hriattir tawhin, pawisa pek tur pawh hi Finance Department in a ngaihtuah mek tih a sawi bawk.

Hetihlai hian Mizoram Polytechnic Lunglei-a Principal Lalnuntluanga chuan Inrinni khan Lunglei Police Station-ah FIR thehlutin Polytechnic ram neitu Sporta, Theiriat chu 8.4.1979-ah a thih tawh laiin kum 2018-a a ram, Polytechnic awmna hmun P. Patta a renew-na ah hming a la sign tih a tarlang nia thudawn a ni a, “H.Sport-a thih hnuah hian renew char char niin a lang a, chutah chuan kum 1986 a\angin an renew apiangin forge signature an siam zel tihna a ni. Sport-a leh H Sport-a hi mi pakhat an nih leh nih loh min tihchian sak tur leh forge signature siamtu ah hian kan rinhlelh ber chu Vanlaldawngliana, Theiriat a ni a, midang pawh an tel thei tho,” tiin thil tisualtu hi zawnchhuah saka, thil tisualtu chu dan anga hrem a nih theih nan arang lama hma lak sak turin a ngen nia thudawn a ni bawk.