Biometric Enrolment atan cheng nuai 38 ruahman

Mizoram-a Myanmar raltlante kutzia leh mit-naute lakkhawm hna thawh bultanna atan cheng nuai 38 ruahman phawt a ni.

Tun July thla chawhnu lam atanga tan tum Mizoram-a Myanmar raltlan awmte Biometric Enrolment kalpui tanna tur atana sum ruahman chu cheng nuai 38 a nih thu Home Secretary Vanlalmawia'n Akashvani Aizawl a hrilh a. Ngawrh taka inpuahchah chhovin July thla chhung ngeia tan hman tura ruahmanna siam a nih thu a sawi a. Cheng nuai 38 hi a bul tanna atana senso ngai zat tur a nih phawt thu a sawi bawk. Senso zawng zawng hi Ministry of Home Affairs (MHA) tum vek tur a ni chungin hna tan hi a hmanhmawh thlak tawh si avangin Mizoram sawrkar sum lo hman phawt a ni dawn ni a thudawn a ni a. Neih sa bakah Computer, Web Camera leh hmanraw pawimawh dangte lei belh a ngai dawn a, lei belh mek zel a ni bawk a. Enrolment portal hi National Informatics Centre (NIC) duan a ni a, Myanmar raltlante chhinchhiahna atan hian Foreigners Identification Portal & Biometric Enrolment (FIP&BE) chu hman a ni dawn a ni.

Tun dinhmunah Mizoram-ah Myanmar raltlan mi 32,504 an awm mek ni a chhinchhiah a ni a. Champhai District-ah tam berin, Lawngtlai District leh Siaha District te'n an dawt a ni. Kum 2021 February ni 1-a sipai-in Myanmar sawrkar thuneihna an pawng lak hnu thla khat vel atang khan Myanmar atang hian raltlan hi an awm tan a ni.