TCZP ten zirlai thar lawmna leh chawimawina an hmang

Tuichangral Zirlai Pawl (TCZP) chuan Inrinni khan kumin-a zirlai thar te lawmna hun, Fresher Social leh kum 2024-2025 Academic Year-a zirlai titha te lawmpuina hun an hmang.
Aizawl-a I&PR Auditorium-a he hun hman hi Agriculture Minister PC. Vanlalruata chuan khuallian nia hmanpuiin zirlai pawl-a inhman chu a hlut thu leh College-a hruaitu nih a tangkai dan te a sawi a, an thlen chin atanga hmasawn zel tum tura zirlaite chu chahin, an zirlai piah lamah Lehkhabu chhiar tam a pawimaw zia hre reng turin a chah a. Cooperative Movement-ah rilru kan sen tlan angai tih pawh sawiin, thalai ten luhchilhin hna neilo te tana hna neihna anih avangin Co-operative lam ngaihven turin zirlaite chu a chah bawk.

He hun hi Hrangturzo Bialtu MLA leh Adviser to Chief Minister Lalmuanpuia Punte in khual zahawm nia hmanpuiin Zirlai Pawl chu hnam hrang hrang leh mize hrang hrang awm-khawmna a nih thu sawiin, Hnam-a min phuarkhawmtu a nih thu leh a pawimawh thu a sawi a. Lehkha thiam leh Degree sang nei chuan Mizoram chhung ringawta hna zawng lova State danga hna zawn intihhmuh a that thu sawi bawkin, Mizo thalai te chu inngaihtuah thar kan ngai tlang tih a sawi a. A Bial chhung tan Skill development neih theihna tur anih chuan MLA Fund atanga siam a inhuam thu a sawi bawk.

TCZP Fresher Social Cum Zirlai titha lawmpuina hunah hian an Adviser Lalnuntawma Fanai bakah MCS Topper Samuel Malsawm-zuala leh MCS Lalrinhlua ten zirlai kalkhawmte fuihna thu an sawi bawk.

Tuichangral Zirlai Pawl (TCZP) hi kum 2003-a din niin 'Sem sem dam dam, ei bil thi thi' tih chu an thupui a ni a, an huamchhungah hian Bawktlang, Biate, Chekawn, East Lungdar, Hmunzawl, Khawlailung, Leng, Lungchhuan, Lung-kawlh, Mualcheng, North Vanlaiphai, Piler, Sailulak leh Sialsir khua te a awm a ni.