I&PR Minister in chawimawina dawngtu lawmpui

Information and Public Relation Minister Dr. Vanlalthlana chuan khawvela Journalism chawi-mawina ropui, Emmy Awards dawngtu mi pahnih, All India Radio Aizawl News Editor te chu nimin khan chawimawina thuziak a hlan.

June ni 26-a khawvela Journalism chawimawina ropui Emmy Awards dawngtu BBC Team-a Mizo hming lang pahnih te hi AIR Editor pahnih HC. Vanlalruata leh Isaac Zoramsanga te an ni a, I&PR Minister hian nimin khan a Office-ah chawi-mawina thuziak leh lawmpuina pawisafai a hlan a ni. He hunah hian I&PR Minister chuan AIR Editor pahnihte a lawmpui thu sawiin, an hnathawh chu chhuanawm a tih thu a sawi a, Mizoram tan mellung pawimawh tak ani tih sawiin, ram-pum huap anga Mizo hming ti thatu an nih thu a sawi a, Mizoram tana theihtawp chhuah zel tura chahin, chanchinbumi dangte tan chona nasa tak siamtu anih thu a sawi a, hmarchhak Bial-a lawmman la thei hmasa ber an nih thu leh khawvel huapa chawimawina ah Mizo hming an tih that avangin a lawm takzet tih a sawi bawk.

He hunah hian HC. Vanlalruata leh Isaac Zoramsanga hian an hnathawh dan sawiin, ni 10 chhunga BBC Team nen an hun hman dan bakah tualchhung mi te nen an thawhho dan an sawi a, anni bakah hian I&PR Department Secretary Betsy Zothanpari Sailo leh Director Lalnunkima te bakah MJA hotuten lawmpuina thu an sawi bawk.

AIR Editor pahnihte hian tunhnaia sem tak Emmy Awards-ah 'Myanmar’s Civil War' tih thupui hmanga BBC in an buatsaih Short-form documentary hian National Academy of Television Arts & Sciences (NATAS)-in News & Documentary Emmy Awards vawi 46-na a buat-saihah Outstanding Continuing News Coverage – Short Form category-ah award an dawng a ni.