Lok Sabha MP in All India Service leh Central Service lam hawi turin thalaite a fuih

Mizoram Lok Sabha MP Richard Vanlalhmangaiha'n All India Service leh Central Service-ah Mizo an tlem ta lutuk chu rualawh a na hle tih sawiin, thalaiten hetiang lam hi hawi deuh deuh se a duh thu a sawi a. MZP General Hqrs. President chuan sawrkar hna lak dik lo nia sawi chu an chhui mek thu a sawi bawk.

Mizo Zirlai Pawl (MZP) General Headquarters buatsaih Under Graduate result 2025-a Gold Medalist-te chawimawina hun nimin-a I&PR Auditorium, Aizawl-a neih a hmanpuina ah Mizoram Lok Sabha MP Richard Vanlalhmangaiha chuan All India Service leh Central Service-ah Mizote kan tlem ta lutuk chu rualawh a nat thu leh thalaiten hetiang lam hi hawi deuh deuh se a duh thu a sawi a, All India Service a luh tumna tak tak neite puih a inhuam reng tih sawiin, tunah pawh puih mek a neih thu a sawi a, “Mi taima, tumna tak tak nena bei mek, harsatna neite puih ka inhuam a, min rawn be hreh lo turin ka ngen che u a ni. Kan ram hi chhe ta vek leh tha lo lutuk anga sawi awm thin mahse, State dangte nen khaikhin chuan kan ram hi kawng tam takah kan la tha hle a. Tan i la deuh deuh ang u,” a ti bawk. 

Nimin-a zirlai titha chawimawina hun hi MZP Vice President Dr. C. Lalremruata'n a kaihruai a, MZP President H. Lalthianghlima chuan tunhnaiah hna lak dik lo sawi a awm leh zauh thin tih sawiin, “Sawrkar hnuaia hna lak eng pawh hi fair takin kalpui nise, a thiam leh tling apiang lak mai nise tih hi MZP duh dan a ni,” tiin Samagra hnuaia tunhnaia hna hrang hrang lak chu July thla chhunga siamthat an phut thu an sawi bawk.

He hunah hian Under Graduate result 2025-a Gold Medalist Arts atangin Lalremsiama (Political Science) Pachhunga University College; Commerce atangin R. Lalngaihawmi (HATIM, Lunglei); Science atangin Mary Lalawmpuii (Home Science) Govt. Zirtiri Residential Science College leh Computer Application atangin Lalruatfela Chhakchhuak (Govt. Zirtiri Residential Science College) te hnenah chawimawina hlan a ni a. College SU, Hnampual zirlai pawl leh MZP chhungkua degree nei thar mi 88 hnenah lawmpuina thuziak hlan an ni bawk.