Hockey Ground siamna atan cheng vbc. 9.88 dah

Sports Minister Lalnghinglova Hmar chuan Hnahthial-a Hockey Ground siamna atan cheng vbc. 9.88 dah a nih thu a sawi.

Hnahthial Sub-Hqrs. YMA buatsaih ‘MLA Cup Inter-Branch YMA Football Tournament’ kharna inkhawm nimin-a Hnahthial District Football Association Turf Ground-a neih a hmanpuinaah Sports Minister chuan India ramin kum 2036-ah Olympics thlen a tum thu a tarlan rualin Mizo infiammi te an tel ve ngei theihna tur Sports atan Hockey chu thlan a nih thu a sawi a. Hockey ground siam tum a nih thu leh Hnahthial chu a siamna hmun tur atan thlan niin Hockey Ground sakna atan cheng vbc. 9.88 dah a nih tawh thu leh Hockey Ground siamna tur bakah hian Bialtu MLA Fund nen tangkawpin Boxing Ring dahna tur Hall sak a nih tur thu a sawi a ni+. 

He hunah hian Bialtu MLA Jeje Lalpekhlua pawhin Infiamna in ke tel a neih chu insumtheihna a nih thu sawiin, infiamna chu damdawi tha tak a nih thu a sawi a, Eng kawngah pawh Hnahthial District chu entawntlak ni thei tura tan la turin mitinte chu a chah a ni. He hun hi Deputy Speaker, Lalfamkima; Adviser to CM H. Ginzalala leh Dr Lorraine Lalpekliana Chinzah bakah MLA T. Lalhlimpuia te pawhin an telpui a ni.

He Tournament-ah hian Cherhlun Branch YMA chu Champion in Bawngchal, Trophy leh Rs. 70,000/- an dawng a, Electric Branch YMA chu pahnihna niin Rs. 40,000/- an dawng a, Semi Final-a chak lo Team pahnih ten Rs. 10,000/- ve ve an dawn bakah mimal leh lawmman dang chi 6 semchhuah a ni bawk.