Laldenga thih champha-ah a Thlan-ah pangpar dah

Nimin July 7, 2025 kha MNF Founder President Laldenga (L) thih champha vawi 35-na niin hemi pual hian a Thlan, Aizawl Treasury Square-ah pangpar dah a ni.

Hemi puala hun hman ah MNF President Zoramthanga chuan, “Pathianin Pu Laldenga min pe hi Mizote kan vanneihna lungphum pawimawh berte zing ami a ni,” tiin “India ram mai ni lo khawvela Mizo hnamte min pholangtu a ni a, khatih hunlaia Zofate mai ni lovin, thangthar zelte thinlungah thleng pawh Hnam thinlung (Nationalism) a tuh a. Sawisela ngaihnep tum awm thin mahse, kan finna a sang tulh tulh a, Pu Denga hlutna hi kan hrechiang chho tulh tulh a ni,” a ti a. Mizo hnam leh Mizoram a awm chhung chu Laldenga hming a daih tawh loh tur thu pawh sawiin, “Pu Laldenga hmanga Pathian in hnam thuthlung min pe hi a ropuiin a lawmawm hle a, kan thuthlung hi hnam dang pawh in min it ngawih ngawih a ni,” a ti bawk.

Laldenga (L) hi July 11, 1927-ah Lunglei Pukpui khuaah a lo piang a, kum 1944-ah British Indian Army zawmin kum 1959-ah Mizo National Famine Front chu a hova din a ni a, chu pawl chu October 22, 1961-ah Mizo National Front (MNF) tiin thlak a ni. Laldenga hi kum 1986 khan Mizoram sawrkar lailawk (interim)-ah Chief Minister a ni a, kum 1987-a Mizoram State Assembly inthlan hmasa berah Sateek leh Aizawl North-II Bial atanga thlantlin a ni a, State kan nih hnua Chief Minister hmasa ber a ni. Kum 1990 khan Cancer a nih hriatchhuah a ni a, USA-ah thla thum enkawl a nih hnuin Mizoram pana an haw kawng Ashford Hospital, London-ah July 7, 1990, India sana-a tlai dar 2:30-ah a thi a. July 13-ah vui niin Mizote zinga State funeral-a vui awmchhun a la ni.