P&E Minister in Electric Bill an tipung lo niin a sawi

Power & Electricity Department changtu Minister F. Rodingliana chuan Electric Bill an tipung lo niin a sawi.

ZPM Party Chhung Inkhawm nimin a neih ah Minister F. Rodingliana chuan Electric Bill an tihpun loh thu hi sawiin, “Billing software kan hman lai, SAP hi a update tawh loh avangin kan mamawh information min pe thei tawh lo a. Central sawrkarin RDSS Scheme hnuaiah software thar IT/OT chak zawk leh mipuite tana hman awlsam zawk tur min siamsak a. Khawl hlui SAP atang hian a thar IT/OT-a Consumer data suanluh hna thawh mek niin hei vang hian Meter Reading a hun takah kan lak theih loh phah a, Department chuan pawi a ti hle,” a ti a. Software thar IT/OT hi Smart Meter hman hunah pawh hman chhunzawm zel tur a ni tih sawiin, “Bill reading tlai vanga rate sang zawk anga mipuiin bill chawi belh nia kan inhriat te hi, kan chawi tam phah loh nan ‘pro-rata’ hmangin bill hun dik taka bill anga siam vek a ni a. Hetiang hi a nih avangin thlakipa chawi dan tur anga siam rem vek a ni,” a ti.

Minister chuan thla hnih bill vawi khatah a kal avangin Electric Bill hi a lang tam nia sawiin, “A rate tariff erawh a la ngai reng a ni. Hetihlai hian kan hmanrua te hi khawl thil niin tihsual palh pawh awm thei a ni a, fel lo palhah department chuan consumer te complain hi enzui nghal zel pawh a tum. Tuna kan Billing application (PEDM Consumer App) ah hian mahni mobile phone atanga complain mai theih a ni tawh. Smart meter hi Mizoram puma vuah chhuak vek turin RDSS scheme hnuaiah hmalak mek a ni a. June 2016 atanga hmalak, Distribution transformer meter chu Aizawl-ah 251 vuah tawh a ni bawk. Heng hna te hi zawhfel a nih hunah chuan electric bill hi tun hun (real time) a pek a ngai tawh dawn a, chumi tur chuan bill period pawh hi ‘pro-rata’ hmanga siamrem a ngai leh mai thei,” a ti bawk.