Kumin-a kangmei venna a hmalak dan thlirlet a ni

Serchhip District Fire Prevention Committee chu nimin khan thukhawmin kumin-a kangmei venna kawnga an hmalakna te an thlirlet bakah kum lo kal zel tura hmalak dan tura tha nia an hriat te an sawiho.
He thutkhawm Serchhip DC Meeting Hall-a neih hi an Chairman leh Bawrhsap Paul L. Khuma chuan kaihruaiin kangmei ven kawnga Sub-Hqrs. YMA hmalakna chu fakawm a tih thu a sawi a, tha zawka ramkang kan ven theih nan thil tisualtute zawnchhuah kawngah te kan theih anga thuneitute kan thawhpui a tul thu sawiin, DC Office in Vantlang viltu app-a siamte pawh hman tangkai theih a nih thu a sawi bawk.

Serchhip District Fire Prevention Committee-a Member Secretary leh Thenzawl DFO R. Lalnungrenga chuan kumin hian State Level a kangmei veng tha thlanna ah Serchhip District chu a titha pahnihna kan nih thu sawiin, March 15 hmaa Lo hal tura hriattirna chhuah thin chuan zawm a hlawh that thu leh a hnu lamah Lo hal an awm tawh lo nia an hriat thu a sawi a. Kumtin a kangmei chhuah fo thinna hmunte pawh kumdang aia uluk zawka ven dan tur chungchang sawiin, Serchhip atanga Thenzawl kawng lama ramkang thelha tui chawina tur, Fire hydrant siam a nih theih nan Fire and Emergency Services ten ruahmanna lo siam se an ti a. khawtin-a VCP te kaihhruaina in Village Forest Fire Prevention Committee pawh tha taka din nise an ti bawk.

He thutkhawm a tarlan a nih danin kumin hian Serchhip-a Fire Services ten kangthelh tura kohna vawi 26 an dawng a, heng zinga 24 chu ramkang niin bawlhhlawh paihna kang leh Eirawng-bawlna Gas avanga kangmei chhuak tum khat ve ve a awm bawk a, June leh July thla ah erawh kohna dawn nei lovin mipuite chu fimkhur zel turin an chah bawk a ni. Nimin-a thutkhawm ah hian Serchhip SP Gavit Gogna bakah Addl. DC Lalrin-zuala, SDO (S) Rebecca Laldinmawii Hrahsel leh Department hrang hrang aiawhte an tel a ni.