Khauh zawka ILP kalpui turin Home Minister ngen

Mizoram Merchant Association (MIMA) chuan nimin khan Home Minister K. Sapdanga chu hmuin Mizoram-a Rel rawn lut turah khauh zawka ILP kalpui an duh thu an thlen.

MIMA hruaitute chuan Rel in Mizoram a rawn lut dawn ta tih sawiin, Rel rawn lut tur hian thatna tam tak neiin, engemaw kawng zawng chuan kan hnam tan that lohna pawh a rawn keng tel ngei dawn nia an hriat thu an sawi a. Mizoram chu Special Area kan nih angin ILP hi felfai leh uluk leh khauh taka kalpui ngei nise an duh thu leh tunhmaa ILP kan lo kalpui dan ang mai maia ILP hi kalpui anih chuan hnam inchim ralna kan hlat dawn lo hle a an hriat thu an sawi a, eizawnna kawnga chimral kan nih lohna turin ruahmanna felfai tak siam turin ngenna a an thlen nghal a ni.

MIMA hian Home Minister hnena rawtna an thlen ah chuan Rel lo luhna tantir Bairabi Rel Sation-a ILP Checkgate chu tihchangtluna, fimkhur leh uluk taka ILP hi pekchhuaha, ILP neisa thlenga uluk taka check mai bakah Computerise vek nise an ti a. Bairabi leh Sairang Rail Station inkar Roadside Station leh Halt Station, Sairang Station thlenga chhuk leh chuang lutte uluk leh fimkhur taka ILP hi tih nise an duh thu leh Sairang Rel Station pawh Passenger-te kal darh nghal mai theih loha hung bawk nise an ti a ni.

MIMA hruaitute chuan kumin January 1-a Lengpui Airport-a ILP pek dan fel lo tak hmuhchhuah a nih thu pawh sawiin, “Ranijani, Meerut, UP a mi chuan Lengpui Airport-ah Temporary ILP a dil a, chu ILP an pekah chuan a phone number ziah turah a blank-in pek a ni a, Purpose of Visit-ah ‘puanthan zuar’ tih a ni bawk a. Puanthan hi a rawn zuar dawn em ni tih tur a ni,” tiin hetiang anih avang hian Rel meuh a lo lut dawn a nih avangin uluk leh khauh taka ILP Enforce dan kawng ngaihtuah hram hram turin Home Minister hi an ngen tih an sawi a ni.