Leimin in a tichhiat Ngopa CHC Minister in a tlawh

Lengteng Bialtu MLA leh Minsiter F. Rodingliana chuan tunhnaia leimin in a tihchhiat Ngopa Community Health Centre (CHC) chu nimin khan tlawhin leiminin a tihchhiat belh zel tur venna tur leh OPD building luah ngamloh sawn lailawk dan turte a enpui.

Minister F. Rodingliana hian Saitual Bawrhsap leh Champhai Chief Medical Officer te nen khawtlang hruaitute kawmin Ngopa CHC Medical Officer Dr. Lalrintluangi chuan leimin avanga harsatna an tawh chhoh dan a tarlan bakah, leimin avang hian OPD Building leh choka te luah ngam lohin a awm tawh thu a sawi a, damlo en pawh Casualty Ward-ah neih rih a nih thu a sawi bawk a. Saitual Bawrhsap Dr. Lalngura Tlau leh CMO Dr. R. Lalniliana te chuan NHIDCL lamin an kawng laih  avanga damdawi In ram min chungchanga an hmalakna leh ruahmanna an siamte an tarlang bawk.

He hunah hian Minister F. Rodingliana chuan Geologist ten lei chet dan te an zirchian nghal tur thu leh a siamthat dan tur pawh NHIDCL te leh PWD bakah NHM Technical Wing lama mithiamten ruahmanna an siam thuai dawn tih a sawi a. Leimin avanga harsatna a thlen hma daih atang tawh a Ngopa CHC building chu sak that tura ruahman tawh a nih thu sawiin, sakthatna tur pawisa pawh a awm tawh thu a tarlang bawk. Minister chuan hun lo kalleh zel tur thlir chunga khum 50 tal awm tura CHC chu tihlen a tul thu sawiin, a tul chuan damdawi In awmna pawh sawn mai turin hma thlir thui tak nei turin khawtlang hruaitute leh Official kalkhawmte chu a chah a ni.

Damdawi In-a thawktute nen an inkawm zawh hnu hian Minister hian Ngopa Playground chei that mek chu a hmunah en nghalin, hnathawh mekte a tlawh kual nghal bawk a ni.