MZP in Sawrkar hnathawk pension tawhte rawih nawn an nih loh nan hmalak zel nise aan ti

Mizo Zirlai Pawl (MZP) Federal Council vawi 59-na chu nimin khan neih niin Sawrkar hnathawk pension tawhte rawih nawn an nih loh nan hmalak zel nise tiin, Mizoram-ah Sairang thlenga Rel a lo luh dawn tak avangin hmun tam zawka ILP Checkpoint siam a nih theihna tura hmalak chu MZP Assembly-ah ngaihtuah nise an ti bawk.

Nimin khan Aizawl-a MZP Conference Hall-ah MZP rorelna sang ber dawttu, Federal Council vawi 59-na chu neih niin MZP rorelna sang ber, Assembly 2025 Agenda tur an ngaihtuah a, Sairang thlenga Rel a lo luh dawn avangin Mizoram chhunga Rel tlanna kawng/Chawlhhmun (Station)-ah ILP checkpoint siam a nih theih nana MZP in hmalak rawtna chu Assembly-a ngaihtuah tura chhawpchhuah nise an ti a, NHIDCL hnathawh chu a that tawk loh thin avangin a at zawk theih nana MZP ten hmalak rawtna pawh MZP Assembly-ah ngaihtuah tura pawm niin Zofa hnam inkhawmpui lian ‘ZOFEST’ chu kum 2026-a neih leh rawtna pawh ngaihtuah nise an ti a. Sawrkar hnathawk pension tawh rawih nawn chungchanga MZP ngaihdan a la ngai reng tih MZP Federal Council chuan nemnghetin, Sawrkar hnathawk pension tawhte rawih nawn an nih loh nan hmalak zel nise an ti bawk.

Nimin-a MZP Federal Council Sitting hi Vice President Dr. C. Lalremruata chuan kai-hruaiin MZP hruaitute leh College SU atangin Palai an kal a, MZP President H. Lalthianghlima chuan Mizo hming hawha Mizoram chhunga hnamdang sumdawnna kalpui an tam ta lutuk leh an huangtau lutuk chu MZP in a vei thu sawiin, tlang hrang hranga MZP te a theih ang anga hnam-dang hming hawha sumdawngte dapchhuaka, hma la turin a sawm a. Hnamdang zingah Mizoram a lirthei khalh an tam thu pawh sawiin, Mistiri ten an duh duh dana rate an inchhiar leh Contractor ang maia Contract System a thil an kalpui chu MZP chuan an ngaimawh hle tih a sawi bawk a. Sawrkar hnathawk leh Department zingah an hamthatna in a ken tel (entitlement) aia tam lirthei kawl an awm tih MZP chuan an hriat thu leh a tul angin an bawhzui tur thu a sawi bawk.