Hnahthial-ah Veterinary Hospital building hawn a ni

Cheng nuai 235 senga sak Hnahthial-a District Veterinary Hospital, Laboratory leh Quarters chu nimin khan AH&Vety Minister C. Lalsawivunga chuan a hawng.

NABARD RIDF-XXVII atanga sum hmuh hmanga sak Hnahthial-ah AH & Vety Hospital & Laboratory building hi a dung ft 42 leh a vang ft 31-a zau niin Ground Floor leh 1st Floor a awm a. Ground Floor-ah hian OT 2 bakah Recovery/Dripping Room, Examination Room, Registration Room, Medicine/Store Room, Waiting Area leh Public Toilet pahnih a awm a. 1st Floor-ah hian Laboratory, CVO Room, VO Room pahnih, Computer Room leh Common Toilet te a awm a ni.

Nimin-a Building thar hawnna hunah hian AH&Vety Minister C. Lalsawivunga chuan Hnahthial District-ah Veterinary Hospital hawn a ni dawn ta chu sawrkar hnathawkte mai bakah mipuite thawhrimna leh thahnem ngaihna rah, a taka kan hmuh a ni, a ti a. Hnahthial chu District te ber mah ni se, District thang duang leh theihna nghah tak an nih thu sawiin, mipui ten tangkai taka an hman ngei a beisei thu leh Hospital chu tun baka tih changtlun belh zel an tum thu a sawi a ni.