HIV ven leh inzirtir lamah hmalak a nih thu sawi

Health Minister Lalrinpuii chuan Sawrkar-in HIV darh zel tur ven leh inzirtir lamah nasa takin hma a la tih a sawi.

Inrinni khan Mizoram State Positive Network (MSPN) tlangzarhna hun Aijal Club-ah neih niin he hun a hmanpuina ah Health Minister Lalrinpuii chuan Mizoram-a HIV veite inzawmkhawmna leh intihchaktawnna tur pawl din a ni chu lawmawm a tih thu sawi a. HIV hrik pai ten tha taka ART an lak chu Sawrkar pawhin a ngaih pawimawh thu sawiin, a thlawna ART lak theihna Centre 14- ZMC&H, Kulikawn Hospital, Synod Hospital leh District Hospital tinah buatsaih a nih thu a sawi a. Kan rama ruihhlo rawn lut nasa chuan thil tha lo tam tak a kentel thu leh HIV pawh a tih darh nasat phah thu tarlangin, kan rama ruihhlo rawn lut tur dan a pawimawh zia leh ruihhlo ti lo tura inzirtirna neih a pawimawh thu a sawi bawk.

He hunah hian Khualzahawm MSACS Project Director Dr. Jane Ralte chuan Mizoram-a mihring awm zat atanga chhutin HIV vei zaa 2.73 an awm mek tih sawiin, India ram puma a sang ber kan nih thu leh HIV vei thar erawh kum 2018 atangin an tlem tual tual tih a sawi bawk.

MSPN hi kum 2021 khan Lalruatfeli’n a din a, kum 2024 khan Firms & Societies-ah an in register a. Mizorama HIV hrik paite an damkhawchhuah theihna turte, taksa leh rilru hrisel an neih theihna tur leh khawtlanga HIV hrik paite enhranna a reh theih nante hma an la thin a ni.