CM hnenah Honorary Doctorate Degree an hlan

Tamil Nadu-a awm Karunya University chuan Mizoram Chief Minister Lalduhoma hnenah Honorary Doctorate Degree an hlan.

Chief Minister Lalduhoma hian Inrinni khan Karunya Institutes of Technology & Sciences (Deemed to be University), Coimbatore, Tamil Nadu-in an Campus-a Convocation vawi 31-na an neih chu hmanpuiin Chief Minister hi Honorary Doctorate Degree an lo hlan a, “Executive Council of Karunya Institute of Technology & Sciences (Deemed to be University) chuan hmingtha taka khawtlang rawng a bawl thinna te, hmathlir tha tak nei ram hruaitu a nih vang te, remna leh muanna a awm theih nana nghing lova a inpek thinna te, hma-sawnna leh mipui sawrkar dinna kawnga a hnathawh tha tak tak te avangin Pu Lalduhoma, Chief Minister of Mizoram hnenah Doctor of Letters (Honoris Causa) a hlan” tiin an hlan chhan hi an sawi a ni.

Chief Minister Lalduhoma chuan Karunya University in Honorary Doctorate Degree an pek chu an rawng a bawlsak mek Mizoram, ziak leh chhiar thiam vek te chenna (fully literate State) ram mipuite aiawhin dawn a titlu tih sawiin, “Zirna in hmasawnna leh changkanna min thlen zel a ni tih lantirnaah ka ngai a ni,” a ti a. Doctor of Letters an hlan avangin lawmthu a hrilh bawk.

He Convocation-ah hian Chief Minister chuan Degree dawng thar zawng zawng te a lawmpui thu sawiin, an kal zelna turah duhsakna a hlan a. “India rama zirna In tha tam tak hi Kristian te din leh enkawl an ni a. Zirna te, hriselna te, hnuchham enkawlna leh khawtlang rawngbawlna kawng dangah pawh ram pum huapa mipui awm zat atanga tehin tlem hle mah ila, ringtute hian kan thawhhlawk thin. Karunya University pawh hi chutiang rilru pu chunga din leh kalpui a ni a. India chhim lama University tha leh changtlung pawl tak a ni chho ta hial a. Ramin kan hlawkpui em em a ni,” a ti bawk.