Congress thalai ten kawng zirchianna an zofel

Congress Thalaite ten June 24, 2025 atanga Vairengte to Aizawl Road via Khamrang - Sairang kawng dinhmun enfiaha an zirchianna chu nimin khan an zofel tih an sawi.

Mizoram Pradesh Youth Congress Committee (MPYCC) President Laltawnliana chuan Vairengte atanga Sairang inkar chu kumin January - May thla chhung khan Fur ruahtui tlak huna Mizoramin harsatna an tawh loh nan hmanhmawh zawka kawng siam hnathawk turin kawng siamtute nen thingpui inhona tum thum neih a ni tawh tih an sawi a. ZPM sawrkarin kawng chhe siam chu sawi loh, kawng tha sa pawh an tichhia nia sawiin, “Mizoram chhung kawng khawi lai pawh zawh hleih theih loh khawpa chhia, Motor tlu leh tang, damlo, zin vek vak leh nitin hnathawktute harsatna a thleng nasa tawh. Khawiah nge Diesel leh Petrol-a chhiah (cess 2%) September 2024 - March 2025 chhunga ZPM sawrkarin mipui a rawkna Road Maintenance cess atan chhiah Rs. 23,43,01,800/- an khawn kha a awm? ZPM Chief Minister chuan motor pakhat bak a mamawh dawn lo titu khan tunhnaia motor thar leina atan a hmang ta em ni?” a ti.

PWD Minister Vanlalthlana'n June ni 30, 2025-ah thubelhchian dawl lo hmangin, he kawng pawimawh tak chungchang hi Mizoram PWD mawhphurhna a ni lo tih a sawi nia sawiin MPYCC President chuan, hei hi thudik lo a ni tih a sawi a, “NH 06 package 8 (Kawnpui - Khamrang) phei chu Vawiin thlenga Mizoram PWD enkawl a la ni zawk. PWD Minister hian he kawng pawimawh chhe lutuk a mawhphurhna ni lo anga a sawi hi thil zahthlak leh mawhphurhna hre miah lo a ni tih a chiang a. Midang kutah PWD Department hi hlan se Mizoram in kan thatpui zawk ang,” a ti a. “Tunah harsatna sutkian kawngah sawrkar hian zah nachang hria se, sawrkar kal tawh mawh-puha insawithiam reng renga an term an hman zawh loh hramna turin hma la tawh rawh se,” a ti bawk.