BJP President in kum 2028-ah MLA a tam thei ang ber neiha sawrkar siam an tum dawn tih a sawi

BJP Mizoram State President thar Dr. K. Beichhua chuan kum 2028 MLA inthlanah MLA tam thei ang ber neih a, Sawrkarna siam ngei an tum dawn tih a sawi.

BJP Mizoram State President Dr. K. Beichhua hian nimin khan Aizawl Upper Republic-a BJP Pisa-ah thuthar lakhawmtute kawmin BJP President thar a nih anga hmalak a tum dan hrang hrang a sawi a. BJP State President a nih angin kal dan tur mumal tak a neih thu leh India hmasawn ruala Mizoram tih-hmasawn chu a tum ber a ni tih sawiin, Mizoten inpumkhatna tha tak an neih theih nan hmalak chu an tum hmasak a nih thu a sawi a. BJP in hma an sawn zel theih nana Grassroot Level atanga siamthat chu a ngai pawimawh dawn tih sawiin, thingtlang lamah Unit Level tam thei ang ber din a, BJP chu Kristian dodaltu Party ni lovin, hmasawn tirtu Party an nihna chu mipui hrilhfiah a, kum 2028-a MLA inthlanah ah a tam thei ang ber MLA neih a, Sawrkar siam chu an tum a nih thu a sawi bawk.

Dr. K. Beichhua chuan hmalakna tur leh a tihtur pawimawh hmasa te sawiin, heng zingah hian Mizoram-a cheng hnam hrang hrangte inpumkhatna tha kan neih zelna tur leh kan Identity, kan Culture leh kan Tradition humhim chu an hmalakna tur a nih thu a sawi a, kan Sakhua, Christianity vawnnun-a hma a sawn zel theih nana hmalak te; Mizoram in kawng hrang hranga hmasawnna kawng kan zawhna tur atana hmalak leh Vikshit India 2047 tih anga Vikshit Mizoram 2047 a thlen theih nana hmalak te chu an tihtur hmasa a nih thu a sawi a. Mizoram Road Connectivity chungchang ah kawng chhe lutuk chu a vanduaithlak em em tih sawiin, “NH-06 Kawnpui to Khamrang inkar kawngpui hi MPWD chan niin, Thallai pawhin kawng a tha lo hle mai a, Mizoram chaklakna pawimawh tak a ni. He hmun a Mizoram Truck Owner Association tena Mizoram mipuite hmakhua ngaia hnatlanga kawng an siamtha hi a lawm awm hle a, BJP chuan kan kawng pawimawh hi Fur leh Thal-a tha taka Motor a tlan theih nan hma kan la dawn a ni,” a ti bawk a. ATL Road tuna kawngchhiat vanga kan buai mekna pawh an ngaipawimawh hle dawn tih sawiin, mipui ten kawngchhiat vanga harsatna kan tawh nawn tawh loh nan hmalak tum a nih thu a sawi bawk.

BJP State President thar chuan Pathian leh an hotute duhsakna avanga President a nih chhungin Central lamah Mizoram hmasawnna tur atana theihtawp chhuaha hmalak atum thu a sawi a, “BJP State President ka lo nih hian BJP Member lo ni tawh zawng zawngte, Party danga engemaw avanga lo peng te kan awm a ni thei a, nimahsela tunah hian Mizoram leh hnamin hma a sawn zel theihna turin BJP-ah lo kir leh vek turin ka sawm tak meuh meuh che u a, Mizoram mipuite, thalai lehkhathiam tak takte hmabak eng kan neih theihna tur atana BJP a lolut a Mizoram tana hnathawh kawr min hakpui turin ka sawm vek che u a ni,” a ti bawk.