MUHCS-ah mipui tana inziahluh hun a tawp

Mizoram Universal Health Care Scheme (MUHCS)-ah mipui nawlpui tana inziahluh theih hun chu nimin June ni 30 khan a tawp ta.

Mizoram sawrkar in damdawi In-a damlo enkawlte tana sum pek ngai lova inenkawl theihna tura a ruahman, MUHCS-ah hian inziahluh dan chi hnih awmin Online-a sum chawia inziahluh theihna hun chu nimin June ni 30, 2025 thleng khan hawn a ni a, Inrinni leh nimin kha sawrkar chawlh a nih avangin Offline-a Sub-Centre leh hmundanga inziahluh theih hun chu Zirtawpni khan a tawp tawh thung a. June thla a ral hnu hian inziahluhna hun hi khar zui niin August thla ah hun hawn leh tura ruahman a ni a, hetah hi chuan inziahluh man pangngai aia zaa 50 in a sang tawh dawn a ni.

Kumin April ni 1 atanga MUHCS kalpui a nih atangin damlo 12,864 enkawl an ni tawh a, damlo enkawlna senso sawrkarin a pekchhuah tawh chu cheng vbc. 15.9 a tling tawh a. Hriat theih chinah June ni 24 thleng khan MUHCS-a mi nawlpui sum chawia inziaklut chhungkaw 7,835 an awm tawh a, Pensioner inziaklut 9,310 an awm bawk. MUHCS hian sawrkara thawk nghet a huam bakah, Provisional Employee CSS leh Grant-in-aid atanga hlawh la te pawh a huam a, sawrkar laipui in Health Care Scheme a duan Pradhan Mantri Jan Arogya Yojana (PM-JAY) beneficiary’s chhungkaw 2,19,072 an awm mek a, hemi hnuaia inziaklut te chu MUHCS hnuaiah inziahluh ve kher a ngai lo a ni.