Chargesheet la thehluh loh vangin pungkhawm

Champhai Bethel Veng mipuite leh zirlai pawlte chu an Veng mi Pausianmuanga (PS Muanga) thihna chungchang chhuitu Case Investigating Officer (IO) in huntiam chhunga Chargesheet a thehluh loh avangin nimin khan Champhai Police Station tualah an pungkhawm.

Champhai Bethel Veng khawtlang chuan kumin March ni 29-a thi PS. Muanga thihna chungchang chhuitu Case Investigating Officer hian huntiam ni 90 chhung a ral hnu, nimin thlenga Court-a Chargesheet a la thehlut lo chu Bethel Veng mipui zahlohnaah an ngaih thu sawiin, ni 97 chhungin Case Investigating Officer (IO) hian engnge a tih tih chu an zawhna a nih thu an sawi a. Court-in pawikhawihtu-a puhte chungchang rel tur phek khat pawh an la hmuh loh avangin bail-a chhuah an dilna Court-in a phalsakah ngaiin lungawi har an tih thu an sawi a. He thil hi mi hausa leh mirethei thliarhranna ni-a an ngaih thu sawiin, inthliarhranna awm loa hmalak an duh thu an sawi a, PS Muanga tualthih chungchangah hian rorelna dik an phut thu an sawi bawk a ni.

Champhai Police-te chuan kumin March 29 zana Pausianmuanga, Champhai Bethel Veng thihna ah hian mi pakua an man a, Pausianmuanga hi Chhangphut Field Gallery atangin a thlang lamah tla thla a, damdawi In panpui a nih hnuah a hliam tuar lovin a thi a. He thil thleng chungchang ah hian FIR thehluh niin he thihna thleng chungchangah hian insualrawnna a thleng ngei nia hriat a ni a, a mawhphurtua puh mi pakhat Lalruatthara, Champhai Kanan Veng nia insawi chu March 29 zan khan Champhai Police kutah a inpe a, Police ten an chhuizuina kal zelah thu zawhfiah turin mi pariat an man belh a ni.