Kumin June thla ah ruahtui tla a tam; Nikum aiin nunna chan erawh an tlem thung

Thla kalta June 2025 thla chhung khan Mizoram-ah ruahtui mm 582.6 a tla nia chhinchhiah a ni a, kumdang aiin ruahtui tla hi a tam nia ngaih theih a ni.

Aizawl-a State Meteorological Centre in an chhinchhiah danin kumdang ang bawkin kumin hian Mizoram-ah June thla ah ruahtui tla a tam a, ruahtui mm 582.6 a tla anga chhinchhiah niin hetiang zat a tlak hi ruahtui tlak dan chhinchhiah a nih hnuah a tam lo a, kum 2017 khan ruahtui mm 743.5 tlain kum 1993 khan mm 638.6 a tla bawk a, kum 2003 khan mm 595.6 leh kum 2012-ah mm 505.5 a tla bawk a, heng kum bakah hian June thla ah ruahtui mm 500 aia tam a tlak hi chhinchhiah chinah a awm ngai lo a. Kumin hian ruahtui a tla tlaiin ruahtui tlak tak tak chu May thla chawhnu lam niin an sawi bawk.

Hetihlai hian Indian Metereological Department (IMD) Aizawl Centre Director, Sudheer Kumar Dwivedi chuan nikum Fur hunlai aiin kumin Fur chhung hian leimin tam zawk mahse nunna chan zat a tlem zawk tih sawiin, hei hi IMD Aizawl Centre, Mizoram sawrkar, thuthar thehdarhtute leh mipuite thawhhona that vang a nih thu a sawi a. Sudheer Kumar Dwivedi chuan kumin Fur kan hman tawh chhungin Mizoram-ah hmun 770 chuangah lei a min a, mi 5-in nunna an chan tih sawiin, nikum Cyclone Remal thlen laia Mizoram hmun hrang hranga leimin zat chu a letin a tlem zawk a, hetihrual hian nikum khan leimin vangin mi 30 chuangin nunna an chan niin a sawi a ni.

IMD Aizawl Centre chuan Mizorama Media Agency hrang hrangte leh Disaster Management te nen tangrualin, Mizoram mipuite hnenah thli tleh leh ruahsur nasa avanga chhiatna thleng theite laka fimkhur tura an inchah that thu a sawi a, thingtlang hmun hla tak taka awm te thlengin khawchhia avanga leimin, thing tlu leh chhum zing avanga khaw hmuh fiah theih loh thleng thei chungchang IMD hrilhlawkna te an lo hriat phah a, hei hian nasa takin chhiatna nasa zawk thleng thei lakah a venhim phah a ni, a ti.

India Meteorological Department (IMD)Aizawl Centre hi July ni 27, 2003-ah din a ni a, Aizawl Office atang hian Lengpui Airport tana Aviation Service te tan khawchin an enkawl a, Kolasib leh Mamit atangin loneitute tana khawchin hriat tur pawimawh te an tichhuak thin a, mipui nawlpuite tana khawchhia avanga fimkhur tura thuchah leh khawchin te chu Media Agency hrang hrang hmangin an tichhuak thin bawk a ni.