Bana Kaih Scheme zirhona neih niin CM Special Package sem thuai tum a ni

Sawrkar Flagship programme inhrilhfiahna, Leadership Sensitization Workshop in The Mizoram Bana Kaih (Handholding) Scheme chu nimin khan Aizawl-a I&WR Auditorium-ah neih a ni a, Handholding Scheme hnuaia loan support te hi Bank loan awm sa nen a kaihkawp a nih thu leh CM Special Package sem thuai a nih tur thu he hunah hian tarlan a ni.

He Workshop hi Mizoram State Policy Coordination Committee (MSPCC) Vice Chairman Dr. KC. Lalmalsawmzauva chuan kaihruaiin thlai thar lei te an zawhfel thawkhat tawh avangin tunah chuan an flagship programme, ‘Handholding- Bana Kaih Scheme’ lamah chak zawkin hma an la thei tawh turah an ngai tih sawiin, “He Scheme hi Mizoram dinchhuahna leh hmasawnna tur hnukpui a nih avangin hlawhtlin kan tum takzet a. Chuvangin fimkhur pawh kan fimkhur,” a ti a. Handholding Scheme hnuaia Loan Support te chu Bank Loan awmsa nen a kaihkawp a nih thu sawiin, heng loan hrang hrang te hi a hmaa awmsa vek ni mahse dahkham tur neih loh avang te, a pung rulh a huphurhawm avang te a Loan la duh si, la theilo tam tak an lo awm tawh thin thu a sawi a. Chhungte tan chuan Sawrkar chuan an harsatna sutkian nan awlsam zawkin an eizawnna tipung turin emaw, bultanna tha siam a eizawnna ngelnghet an neih theih nan Handholding Scheme chu siam a nih thu a sawi a. Interest subvention, loan pung rulh sak hi khawi State sawrkar mahin an la tih ngailoh thu leh Guarantor a tang erawh an awm tawh thin thu a sawi bawk.

Bana Kaih Scheme hnuaia Loan Support hi State sawrkar guarantor-ah a tan avanga rulh ngailo emaw, rulh loh pawi lo emaw a ngaihna awm nia lang chu thil hriatsual pawi em em a nih thu he hunah hian sawilan a ni a. Loan rul tha lo chu Loan chhia-ah chhiar niin thubuai pawh siam sak theih a nih thu an sawi a. CM Special Package sem thuai a nih tur thu pawh tarlan niin he Special Package hi tanpuina cheng nuai khat thleng a nih avangin cheng nuai khat vek an dawng dawn tihna a nih loh thu leh an hmalakna tur mil-a pek an nih tur thu sawilan a ni a. Hetihrual hian tum khatah an dawn tur zat chu an dawn nghal vek tur thu tarlan a ni bawk.

He hunah hian MSPCC Member te leh Partner Bank te aiawh bakah Nodal Department aiawhte an tel bawk a ni.