Council of Ministers ngaihdan lo a kalpui niin sawi

Mizoram Larsap-in tunhnaia Chakma Autonomous District Council (CADC) Governor Rule-a a dah chu Council of Minister ngaihdan lo anga tih a nih thu Home Minister K. Sapdanga chuan a sawi.

Nimin-a Secretariat Conference Hall, MINECO, Aizawl-a thuthar thehdarhtute a kawmna ah he thu hi sawiin Home Minister K. Sapdanga chuan niminpiah a CADC Governor Rules hnuaia dah chungchangah mipuite tana thil ngaihsual palh theih a awma hriat avangin thil awmdan sawifiah chu sawrkarin tul a tih thu a sawi a. Chakma Autionomous District Council-ah hian Elected Member 20 an awm thu leh heng zinga MDC 16 chuan tunhnaiah ZPM party an zawm thu a sawi a. Heng MDC 16 hian ZPM Legislature Party insiamin, CADC-ah sawrkar an siam thei tih thla hmasa ni 16 khan an lantir tih a sawi a. Heng MDC 16-te hi Aizawl-ah lo pheiin Governor hmaah June ni 18 khan an inlan thu leh CADC-ah ZPM Council sawrkar an siam theih thu thlenin siamtir turin an dil nghal thu a sawi. 

He an thu thlen hi Chief Minister Lalduhoma pawhin Larsap hnenah Member 16 nei ZPM Legislature Party chu CADC-ah sawrkar siamtir mai tha a tih thu a lo thlen tawh tih sawiin Home Minister chuan, Larsap in Council of Ministers ngaihdan ziaka thlen tura a phut angin Council of Ministers chuan lungrual takin sawrkarna siam thei an awm chuan Council thiah chu tha a tih loh thu leh Member 16 nei ZPM MDC-te chu CADC-ah sawrkarna siamtir mai turin tun thla ni 5 khan Larsap hnenah ziakin Council of Ministers ngaihdan thlen a nih thu a sawi a. Larsap-in Council of Minister ngaihdan ziaka thlen tura a dil hnuah Council of Ministers ngaihdan ni lo zawnga thutlukna a siam leh ta tho si chu vanduaithlak an tih tak zet thu leh Democracy zahawmna tihmelhem thei ni hiala an hriat thu a sawi a. Hei vang hian Larsap in CADC a thiahna chu sut leh ni se tih chu Council of Minister ngaihdan a nih thu a sawi a ni. 

He hunah hian Home Minister tawiawmtu District Council & Minority Affairs changtu Minister C. Lalsawivunga pawhin chanchinbumite zawhna chhangin Autonomous District Council-ah Anti-Defection Law a awmloh avangin nihna inchuh avangin sawrkar a nghelngheh theih loh thu a sawi a. Hei hi Chief Minister pawhin a lo sawi tawh angin 125th Ammendment-ah Anti-Defection Law chu sAWrkarin an rawt ve thu a sawi a ni.

Kum 2023 May thla khan CADC-ah hian inthlanpui neih niin MNF hruaitu CEM atan Rasik Mohan Chakma chu lakluh a ni a, kumin February ni 27 khan BJP hruaitu Molin Kumar Chakma chuan thlakin CEM hi kumin June 16 khan paihthlak leh a ni a, ZPM in sawrkar siam tum mah se Governor thuneihna hnuaiah dah a ni leh rih ta zawk a ni.