Tuidam leh Darlak inkar PWD Minister in a tlawh

Mamit District chhunga Tuidam leh Darlak inkar kawng, hun rei tak chhe tawh chu nimin khan PWD Minister Vanlalhlana chuan a hmunah a tlawh.

Nimin-a he kawng tlawhtu PWD Minister hi khawtlang hruaitute nen Tuidam-a PWD Staff Lodge-ah inkawmin Hachhek tlangdungin kawng nuam leh zau zawk an nei dawn emaw tih laiin National Highway 44A kawng laitu, Gayatri Infrastructure te an hnathawh a chhiat em avangin chawlh tir an ngai si a, kawng hluiah kal a la ngai tih a sawi a. “Kawng zim takah Balu phur motor lian nitin 40 bawr vel an kal a, nitin mipui chakkhai phur leh zin veivai motor a kal a ngai bawk a. A kawng tet ngaihtuahin lirthei vei vak a tam hle a ni. Tun maia harsatna tih ziaawm lai lawkna tur atan cheng nuai 20 PWD in a sanction tawh a, boulder nena tangkawpin PWD in a thawmthat hna an thawk chho ang,” a ti.

National Highway 44A, Lengte peng atangin kawng thawmthat hna hi kum khat chhung atan Tender chhuah thin a nih thu Minister chuan sawiin, “Tunah hian NIDHI Creative Infrastructure Pvt. Ltd ten an thawk mek a. National Highway kawng laih avanga kawng hlui chei thatna tur Fund, One Time Improvement chu MoRTH-ah dil mek a ni a, NH-44A chawlhsan tawh pawh MoRTH-ah vek hian Balance Work dil mek a ni bawk,” a ti a. “Tunah hian NH-44A kawng laitute nen Aizawl District Court-ah kan inkhing mek a, he kawng laih chhunzawmna tur cheng vbc. 24 hi MoRTH emaw, Mizoram PWD account-ah emaw a awm ngei theihna turin hmalak mek a ni a, Court thu tlukna ngaih chan mek niin a fel ve leh kawng Re-Tender tura hmalak leh nghal a ni ang,” a ti.

Tuidam leh Darlak inkar kawng chhia hi KM 6 vel-a thui niin Pavement Concrete Cement (PCC) in KM khat vel siam a ni tawh a ni.