World Environment Day pualin hnatlang nei

Khawvel pum huapa United Nations (UN) in a kalpui thin ‘World Environment Day’ denchhenin nimin khan PHE Department leh Central YMA tangkawpin Tuikual lui thenfai hnatlang an nei.

He hnatlang neih hi PHE Department-a PMU Office tual-ah a khuhhawnna neiin PHE Engineer-in-Chief, Er. Zodinthari chuan khuallian niin a hmanpui a, Central YMA leh PHE Department an thawkho thei chu lawmawm a tih thu sawiin, Faina leh thianghlimna kawnga Mizoram in hma an sawn zel theih nan YMA leh PHE Department chuan thawhhona tha an neih zel a pawimawh thu a sawi a. Ani bakah hian PHE Secretary Er. Lalrinzuala leh Central YMA President Lalhmachhuana ten thu an sawi bawk.

He hnatlang ah hian YMA atangin Branch pasarih- Tuikual North Branch YMA, Tuikual South Branch YMA, Dinthar Branch YMA, Chawnpui Branch YMA, Ainawn Branch YMA, New Capital Branch YMA leh Maubawk Branch YMA te atangin YMA Member an thawkchhuak a, SBM (G) Ambassador Zira PC chu hnatlang bawkin PHE Department Staff te nen mi 200 chuang an hnatlang a ni.

United Nations General Assembly chuan kum 1972 khan June ni 5 hi World Environment Day atan a lo puang tawh a, a kum leh 1973 atang khan thupui thlan bik neiin hman tan nghal a ni.