Raj Bhavan-ah State 4 te dinchampha lawm a ni

Mizoram Larsap, General (Dr) Vijay Kumar Singh chuan nimin khan a chenna, Raj Bhavan-ah Ek Bharat Shreshtha Bharat hmalakna hnuaiah Sikkim, Goa, Telengana leh West Bengal-te State puitlinga hlankai ni 'Foundation Day' lawmna neih a ni.

Raj Bhavan Durbar Hall-a he hun hmanna ah hian Larsap chuan India rama State leh UT te dinchamphaphak lawmna chu Prime Minister hmalakna, 'Ek Bharat Shreshtha Bharat' hnuaia kalpui a nih thu leh Raj Bhavan leh Raj Niwas tinah te hetiang programme hi neih thin a nih thu a sawi a. Ek Bharat Shreshtha Bharat prog-ramme-ah hian State leh UT hrang hrangte chanchin leh hnam ziarangte pholan thin niin, hnam ziarang leh nunphung danglam tak tak kara inlungrualna leh inunauna tha a awm theih nan buatsaih a nih thu a sawi bawk.

Larsap chuan Sikkim chu State mawi tak, India rama Organic State hmasa ber a nih thu leh nauban lakkhawma zirchianna 'Orchid Herbarium' awmna a nih thu a sawi a. Goa chu tuipui kam State mawi tak, khualzinte tlawh nasat leh hmasawn chak tak a nih thu sawiin, Telengana chu tunhnai leh hmanlai hnam ziarangte mawi leh inrem taka inchawhpawlhna bakah India rama Information Technology hmunpui a nih thu a sawi a. West Bengal chu chanchin ropui tak nei, khaw-tlang nun siamthat leh zalenna sual kawnga hruaitu pawimawh tam takte lo chhuahna a nih thu a sawi bawk.

Sikkim hi May ni 16, 1975 khan State puitlinga hlankai niin, Goa hi May ni 30, 1987 khan State puitlinga hlankai a ni a. Telengana hi India rama State naupang ber niin June ni 2, 2014 khan State puitlinga hlankai a ni a, West Bengal State hi June ni 20, 1947 khan a piang bawk a. Nimin a he hun hman ah hian heng State hrang hrangte chanchin ngaihthlak niin an hnam nunzia hrang hrangte entir a ni bawk.