Vawiin-ah ‘World Environment Day’ hmang dawn

Vawiin June 5, 2025 hi ‘World Environment Day’ a ni a, khawvel hmundang te rualin Mizoram pumah ‘Beat Plastic Pollution’ tih thupui hmangin hman a ni dawn.

Kumin-a World Environment Day thupui hi kum kalta a Plastic in khawvel a tihbuai nasat vanga Plastic atanga khawvel chhanchhuahna lam hawi a ni dawn a, Aizawl Divisional Forest Officer Lalnunsanga Khawlhring chuan Mizoram-ah environment tha tak a awm thu leh boruak thianghlim bakah khawlum lutuk leh khaw vawt lutuk te chu Mizoram-a chengte chuan an la tuar lo niin a sawi a, hei Mizoram vanneihna ani tih sawiin, humhalh uar a pawimawh thu a sawi.

Tunhnaiah Mizoram ramngaw hrang hrang a chereu tih pawh DFO chuan sawiin, ramsa leh nungcha tam tak pawh an chereu mek thu leh humhalh an ngai takzet tih a sawi a, sik leh sa inthlak danah ramngaw humhalh loh chu tuar thei an ni tih sawiin, mipuite tanrual a pawimawh thu a sawi a. Sik leh sa inthlakah natna pung thei a tam phah tih sawiin, heng laka him theihna tur chu ramngaw leh nungcha humhalha tih chereu loh a ni tih a sawi a, khuarel thil inthlak chu tlansan theih a ni lo tih pawh a sawi bawk.