Thingphun-a enkawl zui turin mipuite sawm

Environment Forests & Climate Change Minister Lalthansanga'n Mizoram mipuite chu kumin Green Mizoram Day thupui ‘Ruahtui khawl nan thing i phun ang u’ tih pualin thingphun leh zik tluak taka enkawl turin a chah.

Vawiin-a State puma Green Mizoram Day lo thleng tur puala Mizoram mipuite thuchah a sawina ah Environment Forests & Climate Change Minister Lalthansanga chuan Green Mizoram Day chu duhthusamin tipuitling thei lo mah se, a hlawhtlinna tam tak hmuh tur a awm tih sawiin, zin veivak thin te chuan rilru ti thlamuang tham kawngsirah thingkung hmuh tur an neih a rin thu a sawi a ni.

Minister Lalthansanga chuan Green Mizoram Day kaltlang hian kum 1999 atanga kum 2014 thleng khan thing tiak 46,80,338 phun a ni tawh tih sawiin, Forest Survey Report 2023-a a lan danin, Mizoram-ah a ram zau zawng atanga tehin zaa 85.34 chu ramhnuaiin khuh mahse tan lak a la ngai hle tih a sawi a, nakin zela chhuanthar lo awm turte tan ramngaw siam leh venhim kawngah te, nungcha leh thing chi hrang hrang humhalh kawngah te tlawmngai pawl, Kohhran leh zirna In hrang hrangte tiamin mipuite chu hmalakpui turin a sawm a ni.