Mizo hlang awmna Mizo Territorial Army din turah July 26, 2025 ah recruitment tih tan tum a ni

Mizo hlang awmna ‘Mizo Territorial Army’ din tuma hmalakna kal mekah July 26, 2025-ah Recruitment tih tan tum a ni a. Mizo Territorial Army Hqrs. din nghal lovin Company pahnih din phawtin Territorial Army Bn. (H&H), Assam hnuaiah a awm phawt dawn a ni.

Mizo hlang awmna ‘Mizo Territorial Army Battalion (Home & Hearth)’ din tum a nih chungchanga hmalatu tura ruat, Coordination & Land Search Committee-a Chairman Lt. Col. Clement Lalhmingthanga MLA chuan nimin khan Aizawl Press Club-a thuthar thehdarhtute kawmin Chief Minister Lalduhoma chuan July 5, 2024 khan Chief of Army Staff hnenah Mizo Scout Battalion din tura ngenna a thawn thu sawiin, “Chumi hnu July 6, 2024 khan Chief of Army Staff hi hmaichhanah Mizo Scout Battalion din chungchang hi a sawipui leh a ni,” a ti a. Mizo Scout Battalion din a nih chuan Army an nih angin State pawnah an duty ve a tul thin dawn thu sawiin Lt. Col. Clement Lalhmingthanga chuan, “Chuvangin, Mizo Territorial Army din tha leh zawkah kan ngai, anni hi chu Mizoram-ah chauh duty tur an ni,” a ti a. Chief Minister tirh angin May 9, 2025 khan Army Hqrs., Delhi-ah an hotute a dawr tih sawiin, “Kan population a tlem avangin Mizo Territorial Army Hqrs. din nghal lova Company pahnih din phawt a, chumi hnua tihlen chhoh zel tha an ti ta zawk a ni,” a ti a, Company hnihte hi Territorial Army Bn. (H&H), Assam hnuaiah a awm phawt dawn thu a sawi bawk.

Lt. Col. Clement Lalhmingthanga sawi danin, Territorial Army (Home & Hearts) Mizoram atan hian July 26, 2025-ah Recruitment tih tan tum a ni a, ruahman lawk ang chuan Territorial Army a tang tur lakna hi June ni 14, 2025 atanga tan tur ni mah se, ruahsur nasa leh harsatna dangte avangin thla thar, July thla-ah sawn a ni a, Aizawl District-ah TA a tang tur lakna hi neih hmasak ber tur niin July ni 26-ah neih a ni dawn a. District hrang hrang lak hun tur hi siamfel ni tawhin July ni 27-ah Champhai leh Siaha District tan neiin July ni 28-ah Mamit leh Serchhip District, July ni 29-ah Kolasib leh Khawzawl District, July ni 30-ah Lunglei leh Lawngtlai District, July ni 31-ah Saitual leh Hnahthial District te tan neih a ni dawn a, August ni 1 leh ni 2 chu Reserve Day atan an dah bawk a, Written Test paltlang te chu Medical Test neih pui leh an ni dawn a, chumi paltlang te chu November thla tirah Shillong-a Assam Regiment Training Centre-ah thla 6 vel training tura ruahman a ni.

Tun dinhmunah Mizoram-a Territorial Army (TA)-ah hian mipa chauh lak an ni rih dawn a, kum 18 atanga kum 42, Mizoram-a piang leh seilian an ni ngei tih finfiahna lehkha pawimawh an neih a ngai dawn a ni.

Mizoram-a Territorial Army bul tan nan hian Company pahnih din phawt tur niin Company khatah hian Officer pakhat, Junior Commission Officer (JCO) pakhat leh Rank dang 97 an awm dawn a. Officer dil hun hi nimin khan a tawp tawh a, Mizo tan bik ni lovin rampum huapin a dil theih a, Officer 19, Hmeichhe pakhat leh mipa 18 lak an ni dawn a, July ni 20-ah Exam buatsaih a ni dawn a, Rank dang dil tur te tan pawl 10 pass nih a ngai thung a ni. 

Tun tuma Territorial Army lak tur te hi an Training chhuah ah a dang lak belh zel tura ruahman a ni a, tun dinhmunah chuan Assam Regiment kaih-hruaina hnuaiah an awm phawt anga, kum 4-5 vel a liam chuan Battalion puitling a nih hman mai thei a, chung hunah chuan mahni in an inrel-bawl ang.

Ruahman lawk dan chuan Aizawl leh Lunglei-ah Company khat (1) ve ve an awm dawn a, Sipai duty te chhawktu tur, atul anga che tur leh Civil Administration tanpuitu tur an ni bawk ang.