Sub-Hqrs. YMA in Vehbur khawn atangin mi 36 hnenah Rs. 3,98,000/- an semchhuak
Tun thla tir lama ruahsur nasa avanga chhungkaw tam takin vanduaina an tawh tanpuina atan Serchhip Sub-Hqrs. YMA chuan Serchhip Town chhunga YMA Branch 21-ah Vehbur khawnin Rs. 3,94,850/- hmuh a ni a, hei bakah hian Sub-Hqrs. YMA Serchhip hian Rs. 3,150/- thawh belhin chhungkaw 36 te hnenah Rs. 3,98,000/- hi nimin khan an semchhuak a, Serchhip Town chhunga vanduaina tawk te hi an Veng-ah kalchilhin tanpuina hi an hlan a, Town pawnlam erawh an Branch YMA hruaitute kaltlangin tanpuina hi pekchhuah a ni dawn thung a. Tanpuina dawngtu mi 36 zinga mi 25 te hi Serchhip khawpui chhunga mi te niin midang 11 te hi Serchhip Town pawnlam a mi te an ni thung.
Serchhip Sub-Hqrs. YMA hian vanduaina tawk te hi an vanduaina tawh a zirin sum pek hi hlawm 6-ah an then a, mi pathum te hnenah Rs. 30,000/- hlanin mi 7 hnenah Rs. 20,000/- an hlan a, mi 13 te hnenah Rs. 10,000/- hlanin mi 4 te hnenah Rs. 5000/- an hlan a. Mi pahnih te hnenah Rs. 3000/- ve ve hlanin mi 6 hnenah Rs. 2000/- theuh an hlan bawk a ni.
Nimin-a tanpuina an pek te zingah hian ruahsur nasa avanga leimin in chenna In a hnawl vek 15 bakah In saklai a hnawl chhungkaw pathum an awm a, heng bakah hian leimin avanga In luahzui ngam loh thiah tak chhungkaw 16 awm bawkin thildang atana hman leimin in In a hnawl leh School Choka thiah ngai pakhat ve ve an awm bawk a, leimin vanga nunna chan mi pakhat pawh ralna sum an hlan tel a ni.
Branch mal-ah Serchhip Dinthar Branch chu vanduaina tawk tam ber niin mi 12 te hnenah tanpuina hi hlan a ni a. Serchhip Chhim Veng Branch atangin chhungkaw pali, Serchhip P&E Branch atangin chhungkaw pathum, Serchhip Chanmari Branch leh Serchhip Field Veng atangin chhungkaw pahnih bakah Serchhip Saron Branch leh Serchhip Kawnpui North Branch atangin chhungkaw pakhat ve ve an ni a. Heng bakah hian Zote South Branch atangin chhungkaw panga, Leng khua leh Bungtlang khua atangin chhungkaw pahnih ve ve leh Lungpho leh Thinglian khua ah chhungkaw pakhat theuh te an ni,
Sub-Hqrs. YMA Serchhip hian tanpui ngaite tanpuina tura sum leh pai, tha leh zung seng-a thawhtute zawng zawng chungah lawmthu an sawi tak meuh meuh tih an sawi a. Vanduaina tawktute pawh an tawrhpui thu sawiin, chhawmdawlna leh tanpuina kawnga a tir atanga hma latu Branch YMA te chungah lawmthu an sawi bawk.