MUHCS zawm lo chhan sawi

Mizoram-a sawrkar damdawi In ni lo intel-khawm, Non-Government Hospital Association of Mizoram (NGHAM) chuan Mizoram State Universal Healthcare Scheme (MUHCS) an la zawm ve loh chhan thuchhuah siamin an tarlang.

NGHAM thuchhuah chuan MUHCS chu a kalphung mumal tawk loa hriaiin an la zawm ve rih lo tih sawiin, “Kan harsatna te chingfel tura sawrkar thuneitu hrang hrang nena vawi engemaw zat sawiho a ni tawh chung pawhin inremna a la awm thei chuang lova, a pawi kan ti hle a ni. A nghawng hi a nasa em em a, mipuiin nasa takin harsatna an tawk tih kan hria a, min hriatthiam hram hram kan ngenin kan beisei a ni,” an ti.

NGHAM chuan MUHCS hi damlo ten damdawi In awmna bill an chawi ngai lo (cashless) tura ruahman leh kalpui a ni tih sawiin, chumi awmzia chu an awmna Hospital-in a tul apiangin an lo enkawl anga, a senso tul zawng zawng an lo tum sakin Damdawi In ten sawrkar-ah damlo bill an thehlut anga, sawrkarin damdawi In hnenah damlo enkawlna man hi a peksak thung dawn tih a ni tih sawiin, “Hetiang hi chuan Hospital-ah nitina pawisa lut a awm dawn lova, nitina damlo enkawlna senso hi a hautak tham em avangin ba ringawta damlo enkawl hi Private Hospital-ten kan tlin lo a ni,” an ti.

MUHCS hnuaia damlo enkawlna man (rate) chu Mizoram-a Private Hospital-a an rate hman tlangpuite aiin 50% - 80% velin a hniam zawk tih pawh sawiin, “Hetianga man tlawma damlote kan enkawl chuan kan damdawi In te hian tlakchhiat kan hmabak a, kan thawktu tam tak (Doctor, nurse leh thawktu dang) hlawh pek tur kan nei lo thuai anga, hna an chan phah dawn bawk a ni,” tiin Phailam-a Corporate/Private Hospital te nena sawrkar in inremna a siam chu tha an tih rualin Mizoram Private Hospital-te tana rate chhawpsak nen a inang lo hle niin an sawi bawk.