YMA leh CJM an inkawm
Serchhip CJM Pisa-a an inkawmna ah hian Sub-Hqrs. YMA hruaitute chuan Serchhip-ah Addl. District & Session Judge nghet ala awm loh avanga ruihhlo kaihhnawih a man te thubuai ngaihtuahna kawnga thuhretu-a tang ten harsatna an tawh thu sawiin, Court-a inlan turin Aizawl lamah kal zel a tul thu leh sawrkar in Circuit Court hawngin thla tin chawlhkar khat Serchhip-ah Addl. District and Session Judge hi thu turin ruahman mah se a taka kalpui hleih theih ala nih loh thu te an sawi a. Hei bakah hian Ruihhlo dona kawnga tlawmngaia thawktu ten Dan an hriat theihna tura Awareness Campaign an mamawh thu te an thlen bawk.
Serchhip CJM Lalrochami Ralte chuan hun engemaw chen Serchhip-ah a lo awm tawh thu leh tuna a rawn awm leh hnuah hmasawnna tam tak a lo awm chu lawmawm a tih thu YMA hruaitute hnenah hian a sawi a. Serchhip-ah Addl. District and Session Judge hi a ngheta an la thut loh avanga anmahni lam pawhin harsatna an neih theih dan te lo sawiin, tunkar atang hian Video Conferencing hmangin Addl. District and Session Judge in thubuai a ngaihtuah turte hi ngaih-tuah tura ruahmanna an siam thu a lo sawi a. Hei bakah hian tlawmngaia ruihhlo dona hna thawktu ten Dan an hriat theihna tura Awareness Campaign an mamawhna chu a theih anga tih hlawhtlin dan kawng an zawn tur thu a sawi bawk.
Serchhip CJM chuan YMA te chu hlawh nei lova thawk an ni tih sawiin, Court chuan kal-phung a neih thu leh Dan angin dik takin, rintlak taka an thawh tur thu a sawi bawk a ni. He hunah hian CJM hi Judicial Magistrate First Class cum Civil Judge Josangzeli Tlau chuan a tawiawm a, an hmalakna leh hnathawh dan hrang hrang an sawiho bawk a ni.